Misissuineq: IA-miut pingasut misissuiffigineqartut

Naalakkersuisuni ilaasortat ilaasortaasarsimasullu 2009-miit 2013-mut misissuiffigineqarneranni saqqummersinniarneqarpoq nunatta karsia inuttut nammineq atorneqartarnera nalinginnaasuusimanersoq aammalu ilassinninnermut aningaasaliissutit eqqortumik atorneqarneqarsimanersut. Misissuiffigineqartunut aamma ilaapput Inuit Ataqatigiit Naalakkersuisuni ilaasortarisimasaat arfinillit qinigaaffimmi 2009-miit 2013-imut ilaasortaasimasut.

Maannalu paasinarsivoq partiip Naalakkersuisuni ilaasortarisimasai pingasut (Kuupik Kleistip saniatigut) Ane Hansen, Ove Karl Berthelsen aamma Mimi Karlsen kukkunersiuisunit aamma misissuiffigilluarneqarusussimasut.

Taama Inuit Ataqatigiit kukkunersiuinermut ataatsimiisitaliami ilaasortaatitai marluk, Agathe Fontain aamma Juliane Henningsen tusagassiuutinut nalunaarumminni qulequtaqartumi ‘Inuit Ataqatigiit ammasumik periuseqarnissaq kissatigaat’ oqaluttuarput.

Deloitte paasissutissanik annertunerusumik ujartuisimasoq
Kukkunersiuinermi ilaasortat taakkua marluk oqaluttuaraat kukkunersiusut Maliina Abelsenimut aamma Agathe Fontainimut immikkut maluginiagaqarsimanngitsut. Kisianni paasissutissanik annertunerusumik Ane Hansenimit, Ove Karl Berthelsenimit aamma Mim Karlsenimit piumasaqarsimasut.

- Ane Hansenimut tunngatillugu pineqartoq tassaavoq angalanermut billetsi Ane Hansenip nammineq akilersimasaa. Ane Hansenili sulinngiffeqarniarluni aallartussanngortoq piumaffigineqarpoq angalanini iluatsillugu Aalisarnermut Naalakkersuisutut ataatsimiinnernut peqataajartussasoq, nunaqarfiillu tikissimanngisani
tikinniassagai. Taamaammaat tamatuma kingorna billetsi Namminersorlutik Oqartussanut akiligassanngortinneqarsimavoq. Tamanna qulaajaavigineqarsimavoq. Qulaajaanerup kinguneranik Ane Hansen Namminersorlutik Oqartussanit aningaasanik utertiffigineqartussanngorpoq, Juliane Henningsen aamma Agathe Fontain illersuillutik taama nassuiaapput, imalu nangipput:

- Mimi Karlsenimut tunngatillugu kukkunersiuisut saaffiginnissutigisimasaat tassaavoq Mimi Karlsenip pisortatigoortumik qaaqqusaanerisa ilaanni uiata qaaqqusanut ilaatinneqarsimanera angalanerminilu akiliunneqarsimanera. Pineqartup naammassereernerani Naalakkersuisoqarfiup nalunaarutigisimavaa Mimi Karlsenip uia akiliunneqartussaasimanngitsoq. Tamanna nalunaarutigineqaannartoq Mimi Karlsenip billetsi akilersimavaa.

Ove Karl Berthelsenimullu tunngatillugu Inuit Ataqatigiinni ilaasortat marluk immaqa illersuipput:

- Ove Karl Berthelsen ulluni 14-ni billetsinut tunngasunik Namminersorlutik Oqartussanut akiligassaqarsimavoq. Akileeqqusineq angalanerup qaangiutereernerani pisimavoq. Tmatuma saniatigut angalanermi nassatat oqimaappallaarnerannut 1.934 koruuninik akiliisitsisoqarsimavoq. Kukkunersiuisut tamatumunnga tunngatillugu nalunaarutigaat Naalakkersuisut angalaneranni oqimaappallaanik nassataqarsimanermi qaqutiguinnaq akiliisitsisoqartarsimasoq.