Misissueriaaseq allanngortinneqartoq

Nunatsinni killilersuutit nutaat, coronap tuniluunneranik annikillisaasussat atuutsinneqalerput. Ullumi tusagassiortunik katersortitsisoqarmat tamanna oqaatigineqarpoq.

Oqartussat suliniutit coronap tuniluunneranik annikillisaataasussat manna aallartippaat.

Innuttaasut ersiutillit aamma uummatimimmut puammikkullu nappaatillit, innuttaasullu nammineq misissuutinik atuillutik misissornerminni tunillatsissimasut aamma innuttaasut annertuunik ersiutillit kisimik misissorneqartalissapput. Aamma meeqqat marlunniit aqqanilinnut ukiullit aallartussat misissorneqartassapput, ullormi tusagassiortunik katersortitsinermi tamanna ilisimatitsissutigineqarpoq.

Innuttaasut akiuussutissalerneqarsinnaasut aallartussaatillutik misissuisarfinni tiguneqartassanngitsut ilanngullugu ilisimatitsissutigineqarpoq.

Innuttaasut arlallit ersiuteqaratik ulluni makkunani misissortikkiartortartut peqqinnissaqarfimmut artukkiisimasut, Mimi Karlsen (IA) tusagassiortunik katersortitsisoqarmat ilisimatitsivoq.

Misissueriaatsimik allannguinermi peqqinnissaqarfiup suli artukkeqqinneqannginnissaa qulakkeerniarneqarpoq.

Naalakkersuisut kommunit sukkasuumik misissuutinik katillugit 40.000-inik tunineqarnissaat sulissutigaat, taakku pisortat suliffeqarfiinut agguaanneqassapput, innuttaasut sapinngisamik amerlanerpaat misissorneqarsinnaaqqullugit. Misissutissat taakku ulluni aggersuni takkunnissaat naatsorsuutigineqarpoq.

- Misissuutissat ilaatigut utoqqaat illuinut angerlarsimaffimmilu ikiortinut agguaanneqassapput. Qulakkeerusupparpulli innuttaasut amerlanersaasa angerlarsimaffimminni imminnut misissorsinnaanissaat, aamma innuttaasut taakunannga pisiaqarnissamut akissaqanngitsut. Kommunit namminneerlutik nalunaarutigissavaat agguaassineq qanoq ingerlanneqassanersoq, Mimi Karlsen oqarpoq.

- Angerlarsimaffimmi misissuinerit maannakkorpiaq pissutsinik takutitsisarput. Tassa ersiuteqarani angerlarsimaffimmi missoraanni, tunillatsissimannginnermik takutitsisarput. Angerlarsimaffimmili misissoraani tunillatsissimanermik takutitsippat, inuk pineqartoq ersiuteqassaaq. PCR atorlugu misissuinerit eqqortumik suli takutitsisartussasut, Nunatsinni Nakorsaaneq Henrik L. Hansen oqarpoq.

Imerniartarfiit siusinnerusukkut matusalissasut

Marlunngorneq januaarip aqqarnat aallarnerfigalugu nunami tamarmi imerniartarfiit, cafeet neriniartarfiillu unnukkut quliniit ullaakkut tallimat tungaanut matoqqasalissasut, tusagassiortunik katersortitsinermi ilisimatitsissutigineqarpoq.

Killilersuutit nutaat 2022-mi januaarip 25-at ilanngullugu atuutsinneqassapput, nunamilu tamarmi atuutissallutik.

Ullormi kingullermi coronavirusimik tunillatsissimasut nutaat 477-it nalunaarsorneqarsimapput.

Naalakkersuisut aammaarlutik innuttaasunut kaammattuutigaat, soorlu kaffillernissamik festernissamillu aaqqissuussat taamaatiinnaqqullugit kinguarteqqullugilluunniit.

- Pingaartumik juullikkunni tuniluuttoqarnera annertuserujussuarsimavoq. Sukkavallaamik tamanna pisimavoq. Maanna immitsinnut paarissaagut tunillaassuisoqangaatsiarsinnaaneralu pinngitsoorniarlugu, Henrik L. Hansen oqarpoq.

- Pissusilersuutivut allanngortikkutsigit aatsaat tuniluunnera akiorsinnaavarput. Taamaammat kaffillertunut katersuuttunulluunniit akuliunnaveersaarit. Aamma tamanut inassuteqaatit tunillatsinnaveersaarnissamullu siunnersuutit eqqaamallugit, Mimi Karlsen oqarpoq.

Powered by Labrador CMS