Misissortissimasut arlaannaalluunniiit tunillatsissimanngilaq
Nuummi inuit 90-it missaanniittut marlunngormat coronamut misissortipput. Taakku arlaannaalluunniit tunillatsissimanngilaq, oqartussanilli erseqqissaassutigineqarpoq, tamarmik angerlarsimaffimminni mattusimassasut.
Namminersorlutik Oqartussat marlunngormat unnukkkut nalunaarutigaat, Nuummi inuit 90-it missaanniittut coronavirusimik tunillatsissimanngitsut.
Tamannali tuniluunnerup uninneranik isumaqanngilaq, Namminersorlutik Oqartussat tusagassiorfinnut nalunaaruteqarnerminni erseqqissaassutigaat.
Tunillatsinnermiit napparsimanermut ersiutit malunniunnissaannut piffissaq sivisusinnaavoq. Taamaammat misissortissimasut tamarmik sivikinnerpaamik ulluni arfineq-marlunni angerlarsimaannassapput, tamatumalu kingorna misissorteqqillutik. Misissorteqqinnermi tunillatsissimanngikkaanni aatsaat angerlarsimaannartoqarunnaassaaq, Namminersorlutik Oqartussat nalunaaruteqarput.
Tamarmik misissortissasut
- Tunillatsissimasinnaanermiit ullut 14-it tikillugit ersiuteqalernissap eqqumaffigineqarnissaa pingaaruteqarpoq, aammaluunniit ullumi aqaguluunniit covid-19-imut misissuinermi tunillatsissimannginneq paasineqaraluarpat.
Malunniutit eqqumaffigisassat suunersut corona.gl-imi takuneqarsinnaapput, aammalu tassani qanoq iliorluni tuniluutsitsinaveersaartoqarsinnaanersoq, qaqugulu illoqarfimmi najukkanni akiuussutissanik kapuisoqassanersoq takuneqarsinnaapput.
Nuummi Misissuivik aqagu pingasunngornermi 16. juunimi nal. 09.00 – 09.30 akornanni inuit kaffillernermut apersortittoornermulluunniit atatillugu akuusimasut, allatulluunniit tunillaaviusinnaasuni isersimasimasut sinnerinut ammassaaq.
Ulluni tullerni tunillatsissimasup Ilulissaniittup attaveqarfigisimasai malinnaaffigineqassapput.