Misilittakkat politikkimillu ilisimasat Kimmip toqqarpai

Naalakkersuisunngortut marluk, Jess Svane (S) aamma Jens Immanuelsen (S) marluullutik politikkikkut suliaqarnermi ukiuni arlalinni misilittagaqarput.

Naalakkersuisut Siulittaasuata, Kim Kielsen (S) naalakkersuisunik marlunnut nutaanik, politikkikkut suliaqarnermi misilittagaqarluartunik toqqaavoq. Jess Svane (S) inuussutissarsiornermut, nukissiuteqarnermut ilisimatusarnermullu Naalakkersuisunngorpoq, Jens Immanuelsenilu (S) aalisarnermut, piniarnermut nunalerinermullu Naalakkersuisunngorluni.

Taakku marluk – politikkikkut suliaqarneq eqqarsaatigalugu – misilittagaqarluartut, Atassummit ilaasortaasut marluk, Aqqalu Jerimiassen aamma Siverth K. Heilmannilu kiisalu Siumumit ilaasortaq Nikkulaat Jeremiassen, Naalakkersuisunit ippassaq tunuarmata, taarserpaat.

Jess Svane ullumikkut tikillugu Inatsisartuni ilaasortaavoq. Inatsisartuni ilaasortaanermini aningaasaqarnermut akileraartarnermullu ataatsimiititaliami ilaasortaavoq.

Inatsisartuni issiavini Naalakkersuisut issiaviannik ullumi taarserpaa.

Borgmesteriusimasoq

Jess Svane 2005-imiilli politikkimik suliaqalerpoq, Qasigiannguanilu ukiuni sisamani borgmesteriusimalluni.

Politikkimi atuuffii:

  • Qasigiannguani borgmesteri: 2005-2009
  • Qaasuitsup Kommuniani borgmesteri: 2009-2013
  • Inatsisartuni ilaasortaq: 2014-2018

Inatsisartunut kingullermik qinersinermi Siumut sinnerlugu sassarpoq, Inatsisartunilu sinniisussatut siullertut inissisimagami ilaasortanngorluni.

Aalisarnermut naalakkersuisoq

Jens Immanuelsen (S) Upernavimminngaanneersuuvoq, Jess Svanelu assigalugu politikkimik suliaqarnermi ukiuni arlalinni misilittagaqarluni. Apriilip 24-ani 2018-imi qinersisartunit taaneqarpianngilaq, Inatsisartutullu ilaasortatut isernani. Avannaata Kommuniani kommunalbestyrelsemi ilaasortaavoq, maannalu aalisarnermut, piniarnermut nunalerinermullu Naalakkersuisutut taasinnaanngorluni.

Jens Immanuelsenip politikkikkut atuuffii:

  • Upernavimmi kommunalbestyrelsemi ilaasortaq: 1993-2008
  • Upernavimmi borgmsteri: 1997-2008
  • Inatsisartuni ilaasortaq: 2013-2018

Jens Immanuelsen Avannaata Kommuniani borgmesterip tulliattut siullertut inissisimavoq. Ilisimatitsissutigineqanngilaq kommunalbestyrelsemi atuuffimminit sulinngiffeqassanersoq.

Powered by Labrador CMS