Misigisaq annertooq: Danmarkimi politikkerit Nunatsinniittut

Danskit folketingimi ilaasortat ileqquusumik aasaanerani sapaatip-akunnerani Nunatsinnut angalasarput – ukioq mannalu aamma taamaaliorlutik.

Danskit politikkerii arfinillit ataasinngornermi Kommuni Qeqertalimmut tikissimapput.

Politikkerit Nunatsinniinnerminni aalajangersimasunik suliassaqanngillat. Angalanermi siunertarineqarmat, folketingimi ilaasortat nunatsinni pissutsinik paasisassarsiornissaat.

Angalaqatigiittuupput Stinus Lindgreen (R), Ulla Tørnæs (V), Ellen Trane Nørby (V), Kasper Rough (S), Peter Seier Christensen (NB) aamma Susanne Zimmer (Å).

Politikkerit nunatsinni angalanerannut Issittup Sakkutooqarfiani pisortap tullia Poul Primadahl aamma Nunatsinni rigsombudsmandi Julie Wilche peqataapput.

Angalasut maannamuugallartoq Qeqertarsuarmut Qasigiannguanullu tikeraarsimapput.

Misigisaq annertooq

Kommuni Qeqertalimmi borgmesterip Ane Hansenip folketingimi ilaasortat sisamanngornermi kommunalbestyrelsip ataatsimiittarfiani tikilluaqquai.

Ullup-qeqqasioqatigiinnermi borgmesterip politikkerillu ilaatigut Kommuni Qeqertaliup qanoq pilersinneqarsimanera, kommunimi takornariaqartarneq, nuna eqqissisimatitaq umiarsualiveqarnerlu paasissutissiissutigaat.

Stinus Lindgren aatsaat siullermeerluni Nunatsinniippoq.

- Maaniilluni killitsisimanaqaaq. Pinngortitaq misigisaavoq annertooq, radikaleni politikkeri oqarpoq, nangillunilu:

- Kalaallit Nunaanni ingerlasussanik piareersaallunilu aqutsisarnermi unammilligassat aaqqiiffigiuminaattuunerat misigisaavoq annertooq. Isumaqarpungali sapiissuseqartoqarnera takullugu nuannerluinnartoq, aaqqiissuteqarniarlutimmi iliuuseqartarput.

Politikkerit, rigsombudsmandip Issittullu Sakkutooqarfiani pisortap tulliata ualimut Sisimiuniit aallarnissaat, arfininngornermilu ullup-qeqqata siornatigut Nuummut tikinnissaat naatsorsuutigineqarpoq.