MIO: Sakkortunerusumik pillaasarnissaq aaqqiissutissaanngilaq

Paquminartumik pissuseqartarneq, inooqatigiinni nakkutiginnittarneq pisortatiguunngitsumillu pissaanermik aaqqissuussisarneq tassaapput meeqqat kinguaassiuutitigut kannguttaatsuliorfigineqartarnerannik akiuiniarnermut aporfiliisartut. Meeqqat illersuisuat sakkortunerusumik pillaasarnissaq aaqqiissutaanavianngitsoq isumaqarpoq.

MIO-mit meeqqat kinguaassiuutitigut kannguttaatsuliorfigineqartarnerat nakuuserfigineqartarnerallu pillugit oqallittoqarnera tikilluaqquneqarpoq. Meeqqalli illersuisuata erseqqissaassutigaa, pillaasarnerinnakkut meeqqat atornerlunneqarnissaannut illersorneqarsinnaanngitsut.

- Oqallinermi pineqartup unamminartua uaniippoq, illuinnaasiorluni sakkortunerusumik pillaasarnissap kisimi ukkatarineqarnerani puigussannginnatsigu, meeqqanut kinguaassiuutitigut kannguttaatsuliornerit nakuusernerillu suliassatulluunniit annguttanngimmata, tamannarpiarlu pissutigalugu eqqartuussivinnut anngussinnaanatik, Meeqqanut Illersuisuat Aviâja Egede Lynge tusagassiorfinnut nalunaaruteqarnermi nassuiaavoq.

Meeqqat illersuisuat isumaqarpoq, meeqqat kinguaassiutitigut kannguttaatsuliorfigineqartarnerat nakuuserfigineqartarnerallu pillugu oqallinneq annikillisarlugu inunnut innarliisunut meeqqanullu kannguttaattuliortunut tunngatinneqartariaqanngikkaluartoq, sammineqartoq inuiaqatigiinni katitigaasumik ajornartorsiutaammat paquminartuullunilu ilaqutariittullu inuusunut tunngalluinnartuulluni. Ajornartorsiutip ilungersunarnera pissutigalugu oqaluuserissallugu ajornakusoorpoq – minnerunngitsumillu inerniliiffigissallugu aamma ajornakusoorluni.

Inersimasut inersimasunik illersuisartut

Atatorfillit immikkut ilisimasallit Meeqqat Illersuisuannut oqaluttuarisimavaat, meeqqat kinguaassiutitigut kannguttaatsuliorfigineqarnerat nalunaarutigineqanngitsoortartut. Nalunaarutigineqanngitsoortarnerat ilaatigut nassuiaasersorneqarpoq, tassagooq “tamatta immitsinnut ilisarisimanermik”, tamatumalu malitsigisaanik, meeraq kinguaassiutitigut innarlerneqarsimassappat, taava inersimasoq illersorneqartartoq.

Ajornartorsiullu tamanna nutaajunngilaq. Nunarsuarmimi tamarmik inuiaqatigiinni ikittunnguusuni taamatorpiaq ajornartorsiuteqartoqarpoq. Sakkortunerusumik pillaasarnissaq ajornartorsiummut aaqqiissutissaanngilaq, ajortumilli pisoqaraangat qisuartarnissaq aaqqiissutissaalluni.

- Isumaqatissarsiorneq imaluunniit kinguaassiutitigut innarliisunut sakkortunerusumik pillaasarnissaq kisiat sammigaanni taava qaatungaanersiuineruvoq, ajornartorsiutivik tassaammat inuiaqatigiinni ingerlanerliornermik tunngaviit soorlu pisortatiguunngitsumik pissaaneq inoqutigiinnilu nakkutiginninneq. Pisuni tamakkunani ajoraluartumik takusarpavut, inersimasut inersimasoqatiminnik illersuisut, meeqqatik illersornagit, Meeqqat Illersuisuat oqarpoq.

Suliat amerlanerit eqqartuussivimmi suliarineqassasut

Pingaaruteqarpoq ersarissassallugu kinguaassiutitigut innarliinerit naliginnaasumik isertuunneqartarmata, paquminartunngortitaasarmata nipangiunneqaannartarlutillu, pisuusutut kanngusunnermillu misigisaqarneq patsisiliullugu. Ilaqutariinni annilaanngatigineqartut aamma ataatsimut isigalugit ilagivaat ilaqutariit inuuniutaarussinnaammata.

- Siullerpaatut iliuuserisassavut tassaasinnaapput, inersimasutut inissisimanitsinni paquminarsorisatsinnik pissuseqartarnitta unitseqqaarneqarnissaa, taamaalilluta meeqqap pingaarnerpaamik piginnaatitaaffiata illersorneqarnissaa anguneqassaaq.

MIO-mit peqatigitillugu oqaatigineqarpoq, Kalaallit Nunaanni suliassarpassuit eqqartuussivimmut anngunneqarneq ajornerat ajornartorsiutaasoq.

-Ajornartorsiutaasullu qaangerniarnissaanut immaqa apeqqusiisinnaanerput atorluarlugu paasiniartariaqalerparput suna pillugu taamaattoqarnersoq, Meeqqat Illersuisuat oqarpoq.

Powered by Labrador CMS