MIO: Politikkikkut aalajaatsuuneq amigaatigaarput
Naalakkersuisut nikikkaangasa pinerit tamaasa MIO eqqorneqartarpoq. Meeqqat illersuisuata erseqqissaatigaa, Naalakkersuisoq nutaaq ivertinneqaraangat suliat aallaqqaataaniit soorlu aallartinneqartariaqartartut.
Naalakkersuisut meeqqanut, inuusuttunut ilaqutariinnullu atugassaritinneqartut pillugit qanoq iliuuseqarsinnaassappata, taava aalajaatsuuneq atorfissaqartinneqartoq, meeqqat illersuisuat isumaqarpoq.
- Naalakkersuisuni nikittoqaraangat, taava soorlu aallaqqaataaniit suliaqalerluni, meeqqat illersuisuat oqarpoq.
Aviâja Egede Lyngep meeqqanut illersuisuunermini Naalakkersuisut assigiinngitsut arfineq-marluk ukiuni arfineq-marlunni aqqusaarpai.
- Naalakkersuisoq nutaaq ivertinneqaraangat taava piffissaq annertoorujussuaq paasititsiniaanermut atorneqartarpoq. Taassuma saniatigut politikerit assigiinngitsunik pingaartitaqartarput assigiinngitsunillu salliussassaqarusuttarlutik. Taamaammat aalajaatsuuneq kissaatigaarput. Aalajaatsumik sulisoqanngippat, taava innersuusutigisartakkagut sumut atorneqassagamik, Aviâja Egede Lynge oqarpoq nangillunilu:
- Nunatsinnut tamarmut iliuusissamik pilersaarummik pisariaqartitsilluta noqqaasuteqartarsimavugut, taamaaliornikkummi naalakkersuisut nikittarnerat annertunerusumik sunniuteqartassanngikkaluarmata, siunertarlu ornitassaq ersarissoq, meeqqat atugassarititaanut pitsanngorsaataasussat orninneqarsinnaalissagaluarmata, meeqqat illersuisuat oqarpoq.
Meeqqanut, Inuusuttunut Ilaqutariinnullu Naalakkersuisuusimasoq kingulleq tassaavoq Paneeraq Olsen Naleqqaminngaaneersoq. Sapaatip akunnerata siuliani MIO-p naalakkersuisoq nersualaarlugu tusagassiuutinut nalunaaruteqarput. MIO-mi isumaqarsimavoq naalakkersuisoq innersuussutinut tusarnaartoq suliassaqarfinilu pimoorulluinnarsimallugu.
Peqqinnissaqarfik ilannguppoq
Meeqqanut, Inuusuttunut Ilaqutariinnullu Naalakkersuisoqarfik Inuit Ataqatigiit Nalerarlu naalakkersuisooqatigiilermata apriilimi 2021-mi pilersinneqarpoq.
Pilersinneqarnerata siunertarisimavaa suliassaqarfik annertunerusumik ukkatarineqarnissaa. Naalakkersuisoqarfillu aallartinneqarmalli naalakkersuisut pingasut akisussaasuusimapput.
Eqaluk Høegh naalakkersuisooqaarpoq. Uippakajaarlunilu napparsimalermat Mimi Karlsen naalakkersuisunngorallartinneqarpoq, taassumallu kingorna Paneeraq Olsen naalakkersuisunngortinneqaproq, maannalu Mimik Karlsenimit taarserneqarluni.
Mimi Karlsenilu meeqqat, inuusuttut ilaqutariillu kisiat ukkatarisussaanngilai, peqqinnissaqarfik pillugu naalakkersuisoqarfik aamma naalakkersuisuuffigilerpaa. MIO-li neriuutigaa meeqqanut, inuusuttunut ilaqutariinnullu ukkatarinninneq suli annertussasoq.
- Peqqinnissaqarfik ilanngunneqarnerani neriuutigaara meeqqanut, inuusuttunut ilaqutariinnullu sullissineq ajornerulissanngitsoq. Naalakkersuisoqarfimmi pilersinneqarmat nuannaarutigisimaqaarput, neriuutigaaralu naalakkersuisunngortup innersuussutigut tusarnaasagai qanorlu iliuuseqarfigalugit, meeqqammi atugassarititat pitsanngorsarneqartariaqarput, Aviâja Egede Lynge oqarpoq naggasiilluni:
- Erseqqissaassutigissavara MIO oqartussaanngimmat. MIO meeqqat atugaannik qulaajaasarpoq, politikkerinullu innersuussuteqartarluni. Iliuuseqarnissamut akisussaasuupput politikkerit. Taamaammat neriuutigaara Naalakkersuisunngortussat innersuussutigut qulaajakkagullu tusarnaarumaarai qanorlu iliuuseqarfigisarumaarai, tassami aalajaatsuususeq amigaatigaarput, Aviâja Egede Lynge Sermitsiaq.AG-imut erseqqissaavoq.