MIO: Oqartussat naammattunik paasissutissiisannginnerat angajoqqaanut ernumatitsivoq
Maanna meeqqat oqaaseqartartuat angajoqqaat ilungersunartorsiortut sinnerlugit corona pillugu maleruaqqusat naammattumik paasissutissiissutigineqartannginneranut tunngatillugu sassarpoq. Pisortaniit angajoqqaanut pitsaanerusumik paasissutissiisoqartariaqartoq Aviâja Egede Lyngep ujartorpaa.
Piffissami kingullermi Nuummi atuarfinni meeqqat angajoqqaallu akornanni tunillaasuineq ingerlasimavoq. Oqartussallu Nuummi Upernavimmilu tuniluuneq peqqutigalugu immikkut ittunik maleruaqqusanik decembarip tallimaata tungaanut atuuttussanik pilersitsipput. Maannalu nuna tamakkerlugu maleruaqqusat atuutsinneqalerput ullullu 14-it atuuttussatut siunniunneqarluni.
Meeqqat marlunniit aqqaneq-marluk tungaanut ukiullit pisiniarfinnut ulluinnarni nioqqutissanik akiginiaaffiunngitsuni iseqqusaasimanngillat, neriniartarfinneeqqusaanngillaq eqaarsaartarfinniluunniit. Tamanna novembarip 21-aniit decembarip tallimaat ilanngullugu atuutsinneqarpoq. Taamaakkaluartorli meeqqat atuariartorsinnaasimapput, naak atuarfinni annertuumik tuniluuttoqaraluartoq.
Piffissami kingulliunerusumi angajoqqaarpassuit paatsiveerunnertik aamma ernumanertik oqaatigisaqattaartarpaat, sunami pillugu meeqqat atuariartortinneqarsinnaappat, niuertarfinnut neriniartarfinnullu isersimaqqusaanngippata. Tamanna pissutigalugu Meeqqat Illersuisuat pisortaniit ersarissumik oqariartortoqarnissaa ujartorpaa.
- Maannakkorpiaq angajoqqaat akunnerminni paatsiveerusimaartoqarlunilu toqqissisimanngillat. Tamanna pissutigerpiarlugu pisortani oqartussaasut Corona-mik nalaatarput pillugu kajumissaarniarpakka akulikinnerusumik ersarinnerusumillu oqariartuuteqaqqullugit. Tamanna pisinnaavoq assersuutigiinnarlugu, Facebook-mi angajoqqaanut qupperniliornikkut, tassanilu Corona pillugu ersariffaarissumik, paatsoorneqarsinnaanngitsumillu oqaasertaliornikkut nalunaaruteqaqqullugit, Aviâja Egede Lynge kajumissaarivoq.
Toqqissisimannginneq naammagittaalliornerlu
Qasigiannguani coronavirus tuniluutseqqammerpoq, sapaatip akunnerata siuliani 53-it tunillatsissimasut paasineqarpoq, taakkunanngalu meeqqat amerlanerpaasimallutik. Taassuma saniatigut Nuummi Upernavimmilu tunillaasuuttoqarpoq.
Meeqqat Illersuisuat isumaqarpoq, ersernerluppallaartumik amigartumillu paasissutissiisarnikkut innuttaasuni pisariaqanngitsumik toqqissisimannginnermik naammagittaalliornermillu pilersitsisoqartartoq:
- Sapaatip akunnerani matumani aamma siuliani sarfaarunnitsinni takuarput pisortat oqartussaasut ajornartoorfimmi erseqqissuliornikkut innuttaasuni toqqissisimanermik pilersitsisut. Pilersaarusiukkamik assinganik iliuusissanik inerisaasoqarsinnaasoq pisortaniit, Corona eqqarsaatigalugu, Meeqqat Illersuisuat kajumissaarivoq
Naalakkersuisut decembarip 12-ani kingullermi tusagassiortunik katersortitsipput.