MIO: Meeqqat ukiut 25-t utaqqeqqissinnaanngillat
11. maj 2018-mi Kalaallit Nunaata Naalagaaffiit Peqatigiit Meeqqat pillugit Isumaqatigiissutaannut ilanngunneranit ukiut 25-nngorput. 1993-imi Kalaallit Nunaat ilanngukkamili suliassaqarfimmi inatsisitigut allannguinernik, paasititsiniaanernik ilisimasanillu avitseqatigiinnernik arlalinnik suliaqartarsimavoq. Suliniutilli tamakku naammaqqajanngillat, taama naliliivoq Meeqqat Illersuisuat Aviâja Egede Lynge.
Naalagaaffiit Peqatigiit ukiuni 25-ni atuutereersut – MIO ullut tamaasa meeqqanit ikiortariaqartunit saaffigineqartarpoq.
Tamanna maanna iliuuseqarfigineqassaaq – ukiut 25-t qaangiupparaanngitsoq, meeqqat illersuisuat Aviâja E. Lynge taama ersarissumik oqariartuuteqarpoq.
1993-imi Naalagaaffiit Peqatigiit Meeqqat pillugit Isumaqatigiissutaannut ilanngunnermini, innuttaasut politikkikkut pisinnaatitaaffiinut atatillugit soorlu aamma aningaasaqarnikkut.
- Kalaallit Nunaat Naalagaaffiit Peqatigiit Meeqqat pillugit Isumaqatigiissutaannulli ilanngummat arlalippassuarnik pitsanngoriartoqarpoq: Pingaarnertut inatsisit pitsanngortinneqarput misigaarpullu, meeqqat inersimasullu amerlanerujartortut ilisimaleriartorpaat meeqqat namminneq pisinnaatitaaffeqartut, Aviâja Egede Lynge tusagassiiutinut nalunaarummi allappoq.
- Ullulli tamaasa meeqqat angerlarsimaffimmi, sunngiffimmi atuarfimmilu toqqissisimanngitsut, sillimasut atugarissaanngitsullu pillugit MIO saaffigineqartarpoq. Maanna iliuuserineqartut saniatigut suli allanik pisariaqartitsivugut.
- Meeqqat ikiorneqarnissamut illersorneqarnissamullu pisinnaatitaaffii maanna qulakkeerneqassapput.
Naalagaaffiit Peqatigiit Meeqqat pillugit Isumaqatigiissutaat ukiut 25-t malinneqareersut, isumassuinikkut ajornartorsiutit annertuut, ulluinnarni meerarpassuit misigisartagaat aaqqinniarlugit nutaanik aaqqiissutinik ujaasinissaq Meeqqat Illersuisuata innuttaasunut politikerinullu innersuussutigaa. Tamatumunnga periarfissat ilagaat Naalagaaffiit Peqatigiit Meeqqat pillugit Ataatsimiititaliaata ukiuni 25-ni kingullerni Kalaallit Nunaannut innersuussutaasa misissornerat.