MIO: Meeqqat kingunerlutsitsisut katsorsarneqarnissamik amigaateqarput

Meeqqat sakkortuumik nalaataqarsimanerup kinguneranik tarnikkut uippakajaartut (PTSD) pisariaqartitaminnik ikiorneqarneq ajortut, Meeqqat illersuisuata Aviâja Egede Lyngep nalilerpaa. Meeqqat PTSD-mik takussutissartaqarnersut misissorneqartarnissaat taassuma ujartorpaa.

Meeqqat kinguaassiutimikkut atornerlunneqartut imaluunniit pisumik sakkortuumik nalaataqartut, sakkortuumik nalaataqarsimanerup kinguneranik tarnikkut uippakajaarnermik (PTSD) misigisaqarsinnaapput, soorlu sakkutuut sorsunnerup kinguneranik kingunerlutsitsisarnerat assigalugu.

Kisianni meerarpasuit nunatsinni sakkortuumik misigisaqartinneqartaraluartut, ajornartorsiut arajutsineqartoq, meeqqat illersuisuat Aviâja Egede Lynge naliliivoq.

- Maannakkut meeqqanut sullissisut Kalaallit Nunaanni meeqqat kingunerlutsitsinersut PTSD-qarnersulluunniit misissorneq ajorpaat sakkussaqannginnamik. Psykologit allallu sullissisut tamanna allanngorterusukkaluarpaat, nukinnilli pisariaqarpoq, ilaatigut aningaasatigut sulisoqarnikkullu, kiisalu Namminersortunit pineqartup kivinnissaanut tapersersorneqarnissamik, taanna tusagassiuutinut nalunaarummi taama oqarpoq.

Misissuinermut ilisimasaqarneq siammarterneqassaaq

Meeqqat Illersuisuat sulisut allat peqatigalugit pikkorissarnermut peqataasimavoq, meeqqat kingunerlutsitsisut misissornissaannut tunngassuteqartumik. Misissuinerit maannakkorpiaq nunatsinnut naleqqussarneqartut, taamaalilluni nuna tamakkerlugu atorneqarsinnaanngorlugit.

- Sakkut katsorsaasutsinnut naleqqussarneri, kalaallinut misissuinermi sakkut pitsanngorsarneri. Misissuinermi sakkussat maannakkorpiaq amigaatigisagut. Suliaq siullermeerlugu maannakkut suliaavoq, Kalaallit Nunaanni misigissutsikkut ikiorsiinermik ineriartortitsisinnaasoq. Tamannalu tapersersortariaqarparput, Aviâja Egede Lynge taama oqarpoq, misissuinerit taakku meeqqanut sullissisunut siammarterneqarnissaat alloriarnerup tullissarigaa, taanna oqarpoq.

PTSD sivisuumik atugarigaanni meeqqap ilikkarsinnaaneranut, pissusilersorneranut imminullu nakkarsalerneranut sunniuteqarsinnaavoq.

Powered by Labrador CMS