MIO: Meeqqat ikioqqunerat ima tusaaneqarsinnaavoq
MIO- nalunaarusiaata kingulliup takutippaa meeqqat pisinnaatitaaffii pillugit sullissivimmut meeqqat inersimasullu ullut tamangajaasa saaffiginnittartut oqartussanit tusaaneqanngitsutut misiginertik pillugu. Tamassuma aaqqinneqarnissaanut MIO arlalinnik siunnersuuteqarpoq.
Meeqqat imminut toqunnissaminnik siorasaaruteqarsimasut ikioqqunerat, meeqqat sumiginnarneqarsimasut pinngitsaalineqarsimasullu, meeqqallu pimmatigineqartut oqartussanit tusaaneqanngitsoortarput. Soorlu ippassaq oqaluttuarigipput, MIO-p nalunaarusiamini nutaami innuttaasut sullissivimmut saaffiginnittarneri misissorsimavaat.
Nalunaarusiami ajornartorsiutit qanoq qaangerneqarsinnaaneranik MIO arlalinnik innersuussuteqarpoq. Inerniliussarineqarpoq inatsisit amerlanertigut ajunngitsuusut – ingerlanneqarneralli aaqqinneqartariaqarpoq.
Suleqatigiinneq peqataatitsinerlu
MIO-p innersuussutigaa oqartussat akornanni suleqatigiinnerit aallartinneqarsimasut annertusarneqartariaqartut.
- Peqataatitsineq aamma illoqarfinnut nunaqarfinnullu qularnaarneqartariaqarpoq. Inuit pisinnaatitaaffeqarnerat tunngavigalugu ingerlatseriaatsit, siumut isigaluni periusissiat aamma iliuuseqarnissamut pilersaarutit aqqutigalugit piliarineqartariaqassapput, innersuussutigineqarpoq.
Innuttaasut ikiuutissapput
MIO-p ilanngullugu erseqqissarpaa aaqqissuussaanerup kisimi suliassaq kivissinnaanngikkaa, aammali innuttaasut peqataanerusariaqartut.
- Taamaattumik pilersaarusiorneq najukkanut tunngavilertariaqarpoq, taamaalillutik suliassanik iluarsiinerni innuttaasut ataasiakkaat suleqataasullu inissisimaffimminnik takunnissinnaassammata, aammalu siuariarnissanik sorlernik kissaateqarnermut uuttugaasinnaasunik erseqqissunik takussutissaqassammat.
Aqutsisoqarfinni kultooreqarneq suliassanut aamma ilaavoq.
- Inatsisip malittarinissaanut akisussaaffeqarnerminnik paasinninniarnissaq pisortaqarfiit ilungersuutigissavaat, taamaalilluni suliassanik isumaginninnermi innuttaasoq toqqissisimasutut misigaluni suliassanik isumaginninneq erseqqillunilu suliaqarfiussammat.
Paasissutissanik ujartuisoq
- Pisortaqarfimmi isumalluutit amigaataanerisa patsisaanerannik erseqqissaanissap patsisaasutut inissittariaqarnissaa inissinnissaalu pinngitsoorneqarsinnaanngilaq. Peqqutaaqataalluni sulisorisat piginnaasaat, aammalu suliassamik isumaginissaannut piffissaqarnerat annertusartariaqarput.
MIO-p ilanngullugu innersuussutigaa kommunit tamarmik ersarissumik pimmatiginnittarnerup unitsinnissaanut politikkeqartariaqartut, taamatullu atuarfinni atuarfiillu atuartunut angerlarsimaffiini atugassarititaasut pitsanngortinneqartariaqartut.
Meeqqallu atugaat qanoq ingerlanersut aamma paasiniarneqartariaqarput.
- Meeqqat atugarissaarneranni suliassaqarfiit pingaarnerpaat tamakku iluanni paasissutissat nutarsartuarnissaat pisariaqarpoq. Minnerpaamik uuttorneqarfissatut meeqqat atugarissaarnerannut najoqqutassanik allattuiffiliortoqassasoq siunnersuutigineqarpoq.