MIO: Meeqqanut iliuusissatut pilersaarut maanna inissittariaqarpoq

Immikkoortuni 18-ini meeqqat pisinnaatitaaffii Nunatta unioqqutippai. Maanna iliuusissatut pilersaarutip tamanna iluarsisariaqarpaa, meeqqat illersuisuat taama isumaqarpoq.

Nuna tamakkerlugu meeqqanut iliuusissatut pilersaarummik suliarinnittoqarnissaanik Inuit Ataqatigiit siunnersuutaat, pingasunngorpat Inatsisartuni oqaluuserineqassaaq. Siunnersuutillu taassuma akuerineqarnissaa kigaappallaamik pisoq, meeqqat illersuisuat Aviâja Egede Lynge isumaqarpoq, taassumalu aamma tassani siunnersuummi partiilersortoqannginnissaanik kaammattuivoq.

Kalaallit Nunaata FN-imi Meeqqat Pisinnaatitaaffii pillugit Isumaqatigiissummik akuersineranit ukiut 25-it ingerlareerput, taamaalillunilu Kalaallit Nunaata isumaqatigiissut Kalaallit Nunaata piviusunngortissallugu pisussaaffigaa.

Piffissamut sivikitsumut suliniuteqartoqartarpoq

Kisianni tamanna pitsaasumik ingerlanngilaq. Kalaallit Nunaata Meeqqat Pisinnaatitaaffii pillugit Isumaqatigiissutit 18-it tamarmiusut naammassinngilai, isumaqatigiissutillu taakku isumaginninnermut tunngasuinnaanngillat.

- Naak ukiut ingerlanerini pitsaasunik suliniuteqartoqartaraluartoq suli tassanngaannaq iluarsiapallattarnerit amerlapput , piffissamut sivikitsumut suliniuteqartoqartarpoq, politikkikkut ingerlatseriaatsit nikerarput, meeqqat, ilaqutaat sumiiffinni innuttaasut peqataatinneqartanngillat immikkoortut assigiinngitsut amigartumik aaqqissuussaapput, Aviâja Egede Lynge tusagassiuutinut nalunaarummi allappoq.

- Ataatsimoortumik piffissamut suliniuteqarnissaq pisariaqarpoq, tassani nunatsinni meeqqanut tamanut iluaqutaasumik isumaqatigiissut tunngavigalugu iliuuseqarnissaq qulakkeerniarlugu suliaqarfiit tamarmik peqataatinneqassallutik.

Kisitsisit ilisimaneqanngitsut

Meeqqat Illersuisuat arlaleriarluni Nuna Tamakkerlugu Iliuusissatut Pilersaarusiortoqarnissaanik piumasaqartarnikuuvoq, siullermik septembarimi 2016-imi, iluarisimaarpaalu nuna tamakkerlugu iliuusissatut pilersaarusiortoqarnissaa kiisami aamma politikkikkut kissaatigineqalermat.

- Taamaattoq ullumikkut pigajuttartoq, tassa inunnik isumatiginninnerup meeqqallut isumaginninnermi allaffinni amerlassusai kisitsisaatigineqartut angerlarsimaffiilluunniit avataanni inissinneqarnikut kisiisa isiginiarneqartarneri mianersoqqussutiginissaa pisariaqarinneqarpoq.

- Meeqqat pillugit isumaqatigiissut meeqqanut tamanut atuuppoq, tassunga ilanngullugit meeqqat sumiginnarneqartartut tusagaqarfiginngisaannakkavut (kisitsisit taartut) meeqqallu sumiginnarneqariaannaat. Taamaammat inunnik isumaginninnermi nuna tamakkerlugu iliuusissatut pilersaarusiornissaq nammanngilaq. Nuna tamakkerlugu iliuusissatut pilersaarut meeqqanut tamanut immikkoortunullu meeqqat pillugit suliaqartunut atuutissaaq, soorlu aamma FN-imi Meeqqat pillugit Komitep inassuteqaatigigaa.

Siammasissumik peqataatitsineq

- Nunat tamakkerlugu iliuusissatut pilersaarut pineqartut peqataatillugit suliarineqartariaqarpoq sumiiffiniillu aallaaveqassalluni.

- Meeqqat, angajoqqaat, ilaqutariit, atuarfiit, nunaqarfiit illoqarfiillu aammali innuttaasut inuussutissarsiortullu allannguinermi peqataassapput. Taamaammat pappilissamik uppernarsaasiorneq naalakkersuisoqarfinngortoq naalakkersuisoqarfiuginnartorlu ingerlatsisunillu ikitsuinnarnik ilisimaneqareersunik peqataatitsineq naammanngillat. Iliuusissatut pilersaarut tamatta iliuusissatut pilersaarutigissavarput, peqataatitsinerlu iliuusissatut pilersaarutip imarisaanik taassumalu piviusunngortinneqarnernik piginneqataatitsilersarpoq.

Meeqqat pillugit nuna tamakkerlugu iliusissatut pilersaarusiaat MIO-p piariingajalerpaa, pilersaarullu sunik imaqassanersoq meeqqat inuusuttullu siunnersuuteqarnikuupput.

Powered by Labrador CMS