meeqqat inuusuttullu
MIO-p suliniutit makkua ingerlatissavai
Assigiinngisitsinnginneq meeqqallu akulerutsinneqartarnerat, tassa meeqqat pisussaaffiinik illersuiniaqatigiiffiup MIO-p ukiuni 2016-imiit 2018-imut sulissutiginiagaasa ilamerngi
Meeqqat pisussaaffiinik illersuiniaqatigiiffiup MIO-p ukiuni 2016-imiit 2018-imut pingaarnerusumik sulissutiginiagai maanna aallartinneqarput.
Taamaasilluni MIO-p periusissatut pilersaarutaani nutaami meeqqat atugassarisaat sakkortuumik sammineqarput, aammalu suli samminiarneqarluni Kalaallit Nunaanni inatsit taassumalu atuutsinneqarnera FN-ip Meeqqat Pisussaatitaaffiinutd Isumaqatigiissutaanut naapertuuttuunersut.
Naleqartitat assigiinngitsut
– Periusissatut pilersaarusiatta naammassinissaa qilanaarisorujussuusimavara. Meeqqanik Siunnersuisoqatigiinnik nutaanik pilersitsinissaq - taamaattumillu aamma periusissatut pilersaarutissarput - ukiup affaanik kinguartissimavarput. meeqqanik siunnersuisoqatigiit piginnaasaliupput, tamarmik tunniusimasuupput suliamikkullu nukittuujullutik, meeqqat illersuisuat Aviâja Egede Lynge tusagassiorfinnut nalunaarutikkut oqarpoq.
Periusissatut pilersaarummi naleqartitat assigiinngitsut aallaavigineqarput, ilaatdigut assigiinngisitsinnginnissaq meeqqallu akulerutsinneqartarnissaat. Periusissatut allaaserisami anguniakkat ilagaat illersussallugu meeqqanut tamanut inatsiseqassasoq, sinaakkutassaqartitsisoqassasoq atortuulersitsinermillu suliniuteqartoqassasoq, meeqqat pisinnaatitaaffiini immikkoortunik tamanik ikorfartuisunik.
Inuiaqatigiinnut iluaqutaassaaq
– Qularutiginngilara periutsitigut suliniuteqarfinni suleqatigiilernissaq pissarsiffiusorujussuussasoq aammalu meeqqat inuusuttullu nunami maani pisinnaatitaaffiinut iluaqutaassasoq, meeqqat illersuisuat erseqqissaavoq.
MIO-p iliuuseqarfigisassatut suliniuteqarfigisassai makkuupput:
Ineriartornermut, ilikkagaqarnissamut ilinniagaqarnermullu pisinnaatitaaffeqarneq - qanorluunniit tunuliaqutaqaraluaraanni - inatsimmiit taassuma atuutsinneranut
Meeqqat pisinnaatitaaffii - meeqqat angajoqqaallu isaannit isigalugit
Nunaqarfiit
Meeqqat inuusuttullu MIO-mik pisinnaatitaaffimminnillu ilisimasaqarnissaat
2016-imut 2017-imullu meeqqanut politikkimut inassuteqaatit
Siusissukkut iliuuseqarnissap sammineqarnera - asanninneq silatuunngortitsisarpoq nukittunerulersitsisarlunilu
Meeqqat siunnersuisoqatigiivinut maanna ilaasortaapput meeqqat illersuisuat Aviâja Egede Lynge, siulittaasoq, inatsisileritooq Morten Nornild, socialrådgiveri Sara Abelsen, terapeut perorsaasorlu Anda Poulsen, tarnip pissusiinik ilisimasalik Conni Gregersen, pædiateri (meeqqat nakorsaat) Inga Hjuler aamma ilinniartitsisoq William Kriegel.