MIO Naalakkersuisunut inassuteqarpoq: Imminut toquttarnerup pinngitsoortinnissanut periusissialiornermi inuusuttut peqataatsissigit
Meeqqat illersuisuat naammatsippoq. MIO-p oqaasii naapertorlugit massakkut imminut toqunnissamut pinaveersaartitsinermi periusissiami inuusuttut peqataatsinneqarsimanngillat. MIO-lu maanna inuusuttut ilisimasaanik katersuiniarluni aalajangerpoq.
Politiit 2020-mi ukiormoortumik nalunaarusiaani 41-t imminut toqussimapput, 120-illu imminut toqoriaraluarlutik. Inuillu 1.200-it imminut toqunnissamik 2020-mi aamma sioorasaarisimapput.
- Naammatsippugut. Ukiorpassuarni inuusuttut peqataatsinneqarnissaat oqartussanut oqariartuutigisarsimavagut, maannalu utaqqeqqissinnaajunnaarpugut. Taamaammat inuusuttut namminerisamik innersuussutaat paasiniassallugit aalajangerpugut, Aviâja Egede Lynge Sermitsiaq.AG-imut oqarpoq.
- Taamalillunilu oqallinnissamik piukkunarsaanermut tapertaasinnaalluni, tarnikkut ikiortinnissamik imminullu toqunnaveersaarnissamik pisortat neqeroorutaat inerisarsinnaallugit naleqqussarsinnaallugillu inuusuttut atorfissaqartitaat naapertorlugit, meeqqat illersuisuat, Aviâja Egede Lynge nassuiaavoq.
- Kamaammertarpunga aliasulerlungalu
Meeqqat illersuisuata oqaasii naapertorlugit oqartussani atorfillit ilai imminut toqunnissamik pitsaaliuinermi maanna pikkorissartitsisoqarpoq. Tamanna namminerisamini ajunngilluinnarpoq, kisiannili inuusuttut peqataatsinneqanngillat.
- Ukiorpassuarni sulisut pikkorissarneqartarput, kisianni inuusuttunut soqarneq ajorpoq. Soorlu aamma atorfilittat periussissialiornermi suliaqartarput, taakkualu ajoraluartumik inuusuttut atugarisaanut ilisimanninneq ajorput. Utoqqatseraluarpunga. Kisianni naammatsippugut, meeqqat illersuisuat oqarpoq.
Namminersorlutik Oqartussat ukiorpassuarni iliuusissanik pilersaarutinik paasissutissiillunilu ussassaarinermi annertuumik atuisarput, naak iliuuseqartoqartaraluartoq pissutsit annertunerusumik allanngoriartunngitsut MIO isumaqarpoq.
- Ilisimasakippallaarpugut. Meeqqat inuusuttullu pisortaniit tarnikkut ikiortariallit ornittassaat qanoq tikikkuminartiginersut aamma pisortat tarnikkut ikiuinerat qanoq pitsaassuseqartiginersoq, aamma suna pissutigalugu ikiortissarsiortarnersut imaluunniit ikiortissarsiornaveersaarnersut ilisimaneqanngillat. Ilisimasat taamaattut pingaartuulluinnarput pisortat tarnikkut ikiortinnissamik neqeroorutaannik pitsanngorsaallutalu naleqqussaassagutta, Aviâja Egede Lynge oqarpoq.
Ilisimasaqarnani aqutsinermi pissutsit nunarsuarmioqatigiinnut danskiniluunniit atuuttut kisiisa aallavigalugit ilisimasassanik kopeeriinnariaannaasugut, naak kalaallit inuusuttut atugarisai unamminartullu allarluinnaagaluartut, taanna naqissusiivoq.
Niviap oqalugiaataa ilumoorpoq
Novembarip aallartinnerani atuakkiortoq Niviaq Korneliussen Nunani avannarlerni atuakkiortunut nersornaasiinnermi nersornaaserneqarpoq.
Nersornaaserneqarnermilu oqalugiaatimini ilaatigut oqaatigaa Nunami aqutsisuisunut oqaaseqaatissami allakkaluarlugit. Kisianni soorlulusooq qammakkamut allagaqaannarluni. Politikkerit tusarnaartannginneranut isornartorsiuineq MIO-miit ilisarineqarpoq.
- Maanna ukiuni marlunni tarnikkut ikiorserneqarsinnaaneq ukkatarivarput. Kisianni soorlu politikkerinut oqariartuuteqaraangatta qammakkamut oqaloqateqarluni. Taamaammat massakkut inuusuttut akornanni ilisimasanik aallerniarpugut. Ilisimasaat katersoriarlugit Naalakkersuisunut innersuuteqassaagut. Namminersorlutik Oqartussat siuliani periusissiamik sananikuupput inuusuttut peqataatinnagit, inuusuttullu tusaaneqarnissaat qulakkeerusupparput, Aviâja Egede Lynge naggasiivoq.
Politiit kisitsisaatai:
