MIO-mut aningaasaliissutit amerlanerusut

2017-imut aningaasanut inatsit Inatsisartunit akuerineqaqqammerpoq, tassanilu ilaatigut meeqqanut inuusuttunullu suliaqarfinnut aningaasat amerlanerusut immikkoortinneqarput.

Meeqqat Inuusuttullu Oqaloqatigiittarfiata (MIO) aningaasanut inatsimmi aningaasaliiffigineqartarnera 2 millionit koruuninik qaffaavigineqarpoq, tamannalu meeqqat illersuisuata Aviâja Egede Lyngep qiimmatsaatigaa.

MIO-p aningaasartuutissat atorlugit meeqqat inuusuttullu atugaannik pisinnaatitaaffiinillu ilisimasanik katersineq pitsanngorsarniarpaa kiisalu meeqqat illersuisuata sineriammiinnera annertusarniarlugu.

Atuaruk: MIO nuna tamakkerlugu meeqqanut pilersaarusiortoqarnissaanik piumasaqarpoq

Meeqqanut immikkoortortaqarfik
Meeqqat inuusuttullu isiginiarneqarnerulernerisa saniatigut aamma Dronning Ingridip Napparsimmavissuani (DIH) meeqqanut immikkoortortaqarfik pilersinneqassaaq. Meeqqat Illersuisuata DIH-mi meeqqanut immikkoortortaqalernissamut pilersaarut tapersersorpaa.

- Ukiuni arlaqalersuni ilisimaneqarpoq, DIH-mi nuna tamakkerlugu meeqqat immikkoortortaqarfiat amigaatigineqartoq, maannakkullu immikkoortortami ilaatigut inissaaleqinerujussuaq unamminartuuvoq. Tamanna aamma MIO-p FN-ip Meeqqanut Ataatsimiititaliaanut nalunaarusiornermini eqqaasimavaa, Aviâja Egede Lynge tusagassiuutinut nalunaarummi oqarpoq.

Atuaruk: Meeqqat Illersuisuat: Maannakkorpiaq iliuuseqartoqartariaqarpoq

Nuna tamakkerlugu pilersaarut
Meeqqat illersuisuata aamma neriuutigaa, meeqqat ukiuat 2016, aningaasartuutissanullu inatsit 2017-imi meeqqanik innuusuttunillu immikkut ittumik qiutitsitisoq, ukiuni tulliuttuni amerlasuuni ingerlaqqikkumaartoq, ersarissumillu takuneqarsinnaajumaartoq nuna tamakkerlugu Kalaallit Nunaanni meeqqat inuusuttullu atugaat pillugit iliuusissatut pilersaarummi.

Musikvideo takuuk: Meeqqat pitsaasumik inuuneqarnissaminnut pisinnaatitaaffeqarput