atuarfiit

MIO: Meerarpassuit atuarfinni atugarliorput

Meeqqat atuarfinni atugaannik piaarnerpaamik nuna tamakkerlugu misissuisoqarnissaanut, meeqqat illersuisuat kajumissaaruteqarpoq

Angerlarsimaffimmi eqqissiviilliortoqaraangat, sumiginnaasoqaraarangat imaluunniit pinngitsaaliisoqaraangat, atuarneq artornarlunilu angusaqarfiusannginnera tupaallaatissaanngilaq.

Meeqqat illersuisuatalu Aviâja Egede Lyngep nunatsinni angalatilluni taamaattoqarnera takujuartarpaa.

- Meerarpassuit atuarfinni atugarliorput. Tarnimikkut ajornartorsiutit nassataraa, tamakkulu atuarfimmi atugarliornerannik kinguneqarput, taanna Sermitsiaq.AG-mut oqarpoq.

Kommuneqarfik Sermersuumi Meeqqanut Atuarfeqarnermullu Ataatsimiititap meeqqat atuarfinni atugaat pillugit misissorneqarnerat ullumi oqaluuserissavaat. Misissuineq kommunip kisimi suliarisinnaanngikkaa, kommunimi ingerlatsivik naliliivoq. Taamaattumik ingerlatsiviup nuna tamakkerlugu misissuisoqarnissaa siunnersuutigaa.

Atuaruk: Najukkami atuartut iluarisimaarnerat pillugu misissuititsinissaq akisuallaartoq

Taama ittumik misissuinissaq siusippallaanngitsoq, Aviâja Egede Lynge oqarpoq.

- Meeqqat qanoq innerannik nuna tamakkerlugu misissuinissamik pisariaqartitsisoqartorujussuusoq, MIO-mi isumaqarpugu.

- I MIO mener vi, at der er hårdt brug for en landsdækkende undersøgelse af, hvordan børnene har det.

Atukkat ilikkagaqarnissamut pingaaruteqartut
Ukioqatigiiaat affaasa missaannaat meeqqat atuarfianiit ilinnialeqqittarnerat oqallisigineqaqattaartuarpoq. Kisianni atuarfik aamma atuartitsineq kisiat isigineqarpata ajornartorsiummi qitiusoq takuneqanngitsuussasoq, meeqqat illersuisuat isumaqarpoq.

- Qanoq innerat ilisimagutsigu, taava aamma atuarfinni ajornartorsiutit aallaaviat nalussanngilarput. Ilisimasaq tamanna aatsaat pigileraanni, taava meeqqat atuarfimmi ilikkagaqarluarnissaannut sakkussat tikkuartorneqarsinnaalissapput.

Aaqqissuusseqqinnerit uniuisinnaapput
Tamanna pissutigalugu meeqqat atugaat ilisimaqqissaarnagit, meeqqat atuarfiat allanngortinneqarpat, uniuisoqarsinnaanerat taassuma ernumassutigaa.

- Atukkat pillugit misissuineq meeqqat atuarfianni aaqqissuusseqqittoqannginnerani siulliunneqartariaqarpoq. Taamaaliunngikkaanni akisuallaassaaq, maanna qanoq iliuuseqarnissatsinnut ilisimasagut annikippallaarmata.

Affaat tarnimikkut ajornartorsiortut
MIO-p nunatsinni atuarfiit pulaaraangamigit ajornartorsiutit takujuarmagit, ilisimasap taassuma pisariaqartinneqarneranik Aviâja Egede Lyngep oqariartuuteqarneranut pissutaavoq.

- Atuarfimmi klassit atuartut affaat atugarliortut naapittarnerat qaqutigoortuunngilaq. Allaat illoqarfimmi atuarfik pulaarnikuuarput, ukioqatigiiaat 80 procentii tarnimikkut annertuumik ajornartorsiortut.

- Atuarfiup arlaleriarluni angerlarsimaffimmi annertuumik ajornartorsiortoqarneranik pasilliuteqarluni nalunaaruteqartarsimanera assersuutaasinnaavoq. Sakkortuumik pissusilersornermik takutitsisarput, atuarfiullu atugarliortoqarneranut ernumassuteqartarpoq. Kisianni inunnik isumaginninnermut ingerlatsivimmit qisuariartoqarneq ajorpoq.

Akimut suleqatigiinneq
Nuna tamakkerlugu misissuisoqarneratigut assigiinngitsunik suliaqartut suleqatigiinnissaannut aallartitsisinnaaneranik Aviâja Egede Lynge neriuuteqarpoq, tamannalu pisariaqavissoraa.

- Meeqqat tamarmik atuarnertik pissarsiaqarfigissappassuk, atuarfiit, isumaginnittoqarfiit aamma peqqinnissaqarfiit ataatsimut iliuuseqarnerunerannik pisariaqartitsisoqarpoq. Meeqqat oqartussanit eqqakattarneqartarnerat takussaavallaaqaaq.

Powered by Labrador CMS