Skip to main content

MIO: Meeqqanut atornerlunneqarsimasunut eqqortumik ikiuinissaq amigaataavoq

Meeqqanut kinguaassiuutitigut atornerlunneqarsimasunut Naalakkersuisut immikkut ittumik iliuuseqarnissaat meeqqanik siunnersuisarfiup ujartorpaa

Meeqqanik siunnersuisarfiup MIO-p septembarimi ataatsimiinnermi meeqqanut inuusuttunullu, kinguaassiuutitigut atornerlunneqarsimasunut, pissutsit oqaluuserai.

Kinguaassiuutitigut atornerluinernik nalunaarusiat, siunnersuisarfiup ilisimasai aammalu MIO-p sms-ikkut siunnersuisarfianut saaffiginnittarnerit tunuliaqutaralugit Meeqqanut siunnersuisoqarfiup meeqqat inuusuttullu tamakkua sinnerlugit ernumassuteqarpoq.

Iliuuseqarnissaq qulakkeerlugu

Pingaartumik sinerissami meeqqanut inuusuttunullu neqeroorutit killeqarput, Meeqqanik siunnersuisarfik isumaqarpoq.

Tassami FN-ip Meeqqanut isumaqatigiissutaat naapertorlugu nunat, isumaqatigiissummik atortuulersitsisimasut, pisussaaffeqarput meeqqat kinguaassiuutitigut atornerlunneqannginnissaat illersorniarlugit sunik tamanik iliuuseqassapput, atornerluisoqarsimappallu iliuuseqarnissaq - katsorsaaneq ilanngullugu - qulakkiissallugu.

Meeqqat inuusuttullu kinguaassiuutitigut atornerlunneqarsimasut ikiorneqarnissaat kommunit akisussaaffigaat, Meeqqanulli siunnersuisarfik oqarpoq eqqorneqartut eqqortumik ikiornissaat katsorsarneqarnissaallu ajornakusuukualasartoq.

Meeqqat inuusuttulllu ikiorneqanngitsut

Taamaattumik Meeqqanik siunnersuisarfiup ujartorpaa Naalakkersuisut meeqqanut inuusuttunullu tamakkununnga immikkut iliuuseqarnissaat, taamaasilluni atornerlunneqarnermik kinguninngua ikiorneqarsinnaassallutik, aammalu ornigullunji iluuseqartarnissaq isumaliutigisariaqartoq, tassa kikkut tamarmik nukissaqarneq ajormata ikiortissarsiorlutik saaffiginninnissaminnut.

– Kinguaassiuutitigut atornerlunneqarsimanermi kingusissukkut kinguneqaatit eqqarsaatigalugit Naalakkersuisut suliniuteqareerput, meeqqalli inuusuttullu atornerlunneqarsimasut ikiorneqartarnissaat amigaataavoq, Meeqqat illersuisuat Aviâja Egede Lynge Meeqqanik siunnersuisarfik sinnerlugu oqarpoq.

Taassuma kajumissaarutigaa Naalakkersuisut kommunit peqatigalugit pilersaarusiussasut meeqqat inuusuttullu qanoq isilluni pisariaqartitaminnik ikiorneqarnissaat qulakkeerneqarsinnaanersoq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER