qinngasaarisarneq akiorlugu
MIO: Atuarfiit tamarmik qinngasaaruttarneq pillugu politikkeqartariaqarput
Meeqqat Inuusuttullu Oqaloqatiigiittarfiata atuarfiit tamarmik qinngasaaruttarneq pillugu politikkeqarnissaat kaammattuutigaat. Aammalu inersimasut inuusuttunut meeqqanullu akisussaaffimmik tigusisariaqartut
Sermitsiaq.AG-p ataasinngornermi allaasereriigaatut, meeqqat inuusuttullu amerlasuut nittartakkatigut naapeqatigiittarfitsigut qinngasaarneqartartut.
Tassami meeqqat atuarfianni atuartut atugaannik aamma peqqissusaannik Statens Institut for Folkesundhedip misissuinermut nalunaarusiaani ataasinngornermi saqqummertumi atuarneqarsinnaavoq, nunatsinni meeqqat pingasuugaangata ataaseq arlaleriarluni nittartakkatigut attaveqaatini qinngasaarneqartartoq.
Quliugaangatalu ataatsip qaammammut arlaleriarluni qinngasaartinneq misigisaraa.
Atuaruk: Meeqqat atuartut pingajorarterutaat qinngasaarneqartarput
Qinngasaareriaatsit assigiinngitsut
Maannakkulli atuarfinni iliuuseqartoqartariaqartoq, Meeqqat Inuusuttullu Oqaloqatiigiittarfiat isumaqarpoq.
Meeqqat illersuisuata Aviâja Egede Lyngep sinerissami atuarfiit tamaasa qinngasaaruttarnermut politikkilioqqullugit kaammattorpai, tassanilu allaqqassasoq digitalitigut allatigulluunniit qinngasaarisoqartillugu qanoq iliortoqassanersoq.
- Qinngasaarisarneq pillugu politikki aamma qinngasaareriaatsinik assigiinngitsunik paasissutissiissutinik imaqarsinnaavoq kiisalu atuartut qinngasaarneqartut sumut saaffiginnissinnaanerat pillugu paasissutissanik imaqarsinnaalluni. Atuarfiit qinngasaarinermut politikkeqareersut atuarfinnut allanut isumassarsiorfissatut politikkertik agguaassinnaavaat, Aviâja Egede Lynge tusagassiuutinut nalunaarummini oqarpoq.
Inersimasut akisussaaffimmik tigusissapput
Taanna isumaqarpoq, meeqqat inuusuttullu inersimasunit qarasaasianik atuinermi qanoq pissusilersornissaminnut ilinniartinneqarnissaat pisariaqartoq.
- Internetikkut inuit attaveqatigiittarfianniinnermi innarlerneqaratarsinnaaneq imaluunniit killissat qaangerlugit iliorfigineqarsinnaaneq piupput. Meeqqat internetikkut attaveqatigiittarfinnik atuinerminni imminnut qiviarnissartik namminerlu pissusilersuutimik apeqqusersornissaannut inersimasut akisussaaffeqarput, meeqqat illersuisuat oqarpoq.