Skip to main content

Miniup isertitai arfinillit naammanngillat

Arfininngormat ualikkut unamminermi pissanganaqisumi GOG ilimagineqartumut KIF Kolding København-imut ajorsarpoq

GOG Arena-mi tupaallatsitsinissaq arlaleriarluni ilimanarsisaraluarpoq. Qaffannikut sungaartunik tuluujuarallit Minik Dahl Høeghimik Akutaaneq Kreutzmannimillu unammisartullit, isiginnaartut 2000-ingajaat aammalu Danmarkimi Nunatsinnilu tv-kut isiginnaartorpassuit takutippaat ajugaasinnaanertik upperalugu unammilutik.
Minik Dahl Høegh unamminermi torrallavillugit marlunnik isertitseqqaarpoq, taavalu GOG 2-0-mik siuarpoq. Unammisullu nuannivissunik takutitseqattaarput. Akerariit saassusseqattaarput målmandillu marluk torrallavillugit annaasseqattaartarput. GOG 11-10-mik siuarsimavoq, KIF Kolding Københavnili sukkasuumik marlunnik isertitsigami muminnermi 13-12-mik siuarsimavoq.
Unamminerup immikkoortuata aappaa aallartippoq immikkoortuata siulliup naaneratut pissanganartigisumik. Isiginnaartut pissangatinneqarluarput bænkimilu sungiusaasut marluk, Jakob Larsenip KIF Kolding Københavnillu sungiusaasuata Henrik Kronborgip suut tamaasa atorlugit unammineq aqunniarsaraat.
Qallunaalli nunanut allanut unammisartorisimasaata KIF Kolding Københavnip målmandiata Kasper Hvidtip immikkoortup aappaata qiteqqunnerani unammineq aalajangerpaa. GOG-ip unammisartuisa qasujartornerat ilutigalugu Kasper Hvidt minutsit qulit missaanni annaasseqattaarpoq, ilaatigut periarfissarujussuit arfinillit annaallugit. Inuk qaangigassaanngivissoq GOG-p malugaa. Misileeqattaartuaraluarput, unamminerilli allarpassuit assigalugit Kasper Hvidtip unammineq aalajangerpaa.
Unamminermi GOG 22-27-mik ajorsarpoq. Minik Dahl Høegh arfinilinnik isertitsivoq.
Tapersersorneqarluaqisut
Isiginnaartut 2000-ingajaat unamminerup ingerlanerani arlaleriaqalutik nikuillutik ersaartartarput unammisartutik tapersersorlugit. GOG ukiuni pingasuni Håndboldliga-mi ilaasimanngereerluni uteqqissimavoq kakkannerillu unammisinnaalluarlugit.
Pisarnertut GOG unammigaangat isiginnaartut kalaalertaqarput. Arfininngormat ualikkut ilaatigut ilaqutariit Kreutzmannikkut, pingaartumik Akutaaneq Kreutzmann pillugu, isiginnaaqataapput.
GOG-p arfininngorpat tullianik unamminera tv-kut aallakaatinneqassaaq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER