Ministeriunerup nutaamik parnaarussiviliornissamik Savalimmiormiut neriorsorpai

Danmark Savalimmiuni nutaamik parnaarussiviliornissamut piareersimavoq. Ministeriunerup tikeraarnerani marlunngornermi Savalimmiuni aallartittumi, ullormi siullermi lagmandimut taama oqariartuuteqarpoq.

Ministeriuneq Mette Frederiksen (S) aamma lagmand Bárður á Steig Nielsen marlunngornermi (7. juni) siunertarisamik nalunaarummik atsiorput, tassani danskit naalakkersuisuisa Savalimmiunilu naalakkersuisut Savalimmiuni anginerusumik pitsaanerusumillu parnaarussiviliornissamut piareersarnissaq isumaqatigiissutigineqarpoq.

- Savalimmiunut ulloq pingaaruteqarpoq. Savalimmiuni nutaamik nutaaliaasumillu parnaarussiviliornissaq sulissutigisimavarput. Savalimmiormiut inatsisitigut isumannaatsuunissaannut ulloq nuannersuuvoq, nammineq nunagisami pineqaatissiissutip atornissaa inuit pisinnaatitaaffigimmassuk, lagmandi oqarpoq.

Pingasunut agguarneqassasoq

Siunertaralugu nalunaarut ministeriunerup Savalimmiunut tikeraarneranut atatillugu tusagassiortunik katersortitsinermi saqqummiunneqarpoq.

Suliaq pingasunut agguarneqassasoq tassani saqqummiunneqarpoq. 2023-mi aamma 2024-mi sanaartornissaq pilersaarusiorneqassaaq, inissisimaffissaalu nassaarineqassalluni.

2025-mi aamma 2026-mi sanaartorfissaq naleqquttoq pissarsiarineqassaaq piareersarneqarlunilu.

2027-mit 2030-mut parnaarussivik nutaaq sanaartorneqassaaq.

Danskit naalakkersuisui pilersaarusiornermut aningaasanik immikkoortitsipput, aningaasalerneqarnissaali suli inissinngilaq. Folketingi suliniummut aningaasaleerusussanersoq aalajangiisuussaaq. Oktober 2021-mi misissuinermi, Justitsministeriap suliarisaani parnaarussivik 230 millioninik akeqassaaq.

Radarimut akiliinissaq itigartitsissutigineqartoq

Folketingimut ilaasortat Atlantikup Avannaaneersut siorna ukiunut arlalinnut pinerluttunut isumaginnittoqarfimmut tunngasumik isumaqatiginninniarnermut peqataapput. Ukioq manna januaarimi justitsministerimit oqaatigineqarpoq, Savalimmiuni parnaarussivimmut nutaamut aningaasanik immikkoortitsisoqarnianngitsoq.

Lagmandip suliaq pillugu ministeriunermut qaqissimavaa, kisianni Mette Frederiksenip Savalimmiunut tikeraarnerminut atatillugu taamatut nalunaaruteqarnera naatsorsuutigineqarsimanngilaq, ukiup affaata matuma siorna itigartitsissutigineqarnikuummat.

Danskit Savalimmiormiullu naalakkersuisuisa akornanni isumaqatigiissut sisamanngornermi atsiorneqassaaq, tassani Danmarkip kalerrisaarutinik radarinik ikkussinissaanut Savalimmiut akuersissuteqassaaq.

Nutaamik parnaarussiviliortoqarnissaa radarinut akuersinermut qujassutaanersoq apeqqutaavoq.

- Taamaattoqannginnera ersarissumik oqaatigisinnaavara. Piffissami tassani kissaatit saqqummiunneqartut tamaasa piviusunngortinneqarnissaat kissaatigineqarsimanngilaq. Politik tulleriiaarineruvoq. Politikikkut tulleriiaarinerit ilungersunartuupput, taamaammallu naalakkersuisut nikerartut ullumi aalajangernissatta tungaanut, nutaamik parnaarussiviliortoqarnissaanik tapersiinissaq periarfissaanngitsoq nalilertarsimavaat, Mette Frederiksen oqarpoq.

Powered by Labrador CMS