Ministeriuneq tunngaviusumik inatsisissamut siunnersuut pillugu oqaaseqarumanngitsoq
Danmarkimi Statsministeriet Kalaallit Nunaata namminersortup tunngaviusumik inatsisissaanut siunnersuutip saqqummiunneqarneranut oqaaseqarumanngilaq. Suliaq isertuussaanngitsoq, Danmarkimilu naalakkersuisut suliarineqarnera ilisimagaat, Naalakkersuisut siulittaasuat oqarpoq.
Kalaallit Nunaata namminersortup tunngaviusumik inatsisissaanut siunnersuut tallimanngornermi tamanut aamma Inatsisartunut saqqummiunneqarpoq.
Sermitsiaq.AG sapaatip akunnerata aallartinnerani pisoq oqaluttuarisaanermut ilannguttoq pillugu ministeriunermit Mette Frederiksenimit (Soc.) oqaaseqartitsiniarsimagaluarpoq, nunatta tunngaviusumik inatsisissaanik sulineq qanoq isumaqarfigineraa paasiniarlugu.
Tamannali periarfissaasimanngilaq. Statsministeriet naatsumik allagaqarluni akissuteqarnermini suliaq pillugu oqaaseqaatissaqartoqanngitsoq oqaatigineqarpoq.
Egede: Isertuunneqarsimanngilaq
Naalakkersuisut siulittaasuata, Múte B. Egedep (IA), tunngaviusumik inatsisissatut siunnersuutip saqqummiunneqarneranut atatillugu danskit naalakkersuisui tunngaviusumik inatsisissaq pillugu sulineq ilisimagaat oqaatigaa:
- Danskit naalakkersuisuisa sumik suliaqartoqarnera ilisimavaat, tunngaviusumik inatsimmik isumalioqatigiissitani sulisitsisimanerput isertuunneqarsimanngilaq.
- Danskit naalakkersuisuisa nammineq oqartussanngorusulluta anguniagaqarnerput soorunami nalunngilaat, ministeriunerullu tamanna paasilluarsinnaagaa nalunngilara, Múte B. Egede, Sermitsiaq.AG-mut oqarpoq.
Løkke ersarissumik oqariartuuteqartoq
Inatsit tunngaviusussaq pillugu Isumalioqatigiissitat pilersinneqarmata, Lars Løkke Rasmussen (V) ministeriuneruvoq. Maanna Mette Frederiksenip SVM-illu naalakkersuisoqatigiinneranni nunanut allanut tunngasunut ministeriuvoq.
Lars Løkke Rasmussen taamanikkut tunngaviusumik inatsisissamik suliaqarneq pillugu arlalinnik isornartorsiuivoq.
Tunngaviusumik inatsit namminersulivinnermi atulertussaq taasissutigineqassappat, naalagaaffimmit tapiissutit ukiut sisamat ingerlaneranni atorunnaarsinneqarnissaannik kinguneqarsinnaasoq Folketingimi ataatsimiittarfimmi oqallittoqarnerani ilaatigut oqaatigaa.
Savalimmiut allamut sangusut
- Kalaallit Nunaammi Naalagaaffeqatigiinnermut ilaajutigaluni tunngaviusumik inatsiseqarniarpat naammassiniagassaqarnera soorunami eqqarsaatigisariaqarpoq. Tunngaviusumik inatsit allamik siunertaqartoq kingusinnerusukkullu atuutilertussaq suliarigaanni taava naalagaaffeqatigiinnermut ilaajunnaarnertut isumalimmut pisimassaagut, Lars Løkke Rasmussen 2017-imi Inatsit tunngaviusussaq pillugu Isumalioqatigiissitat pilersinneqaqqammernerani Sermitsiaq.AG-mut taama oqarpoq.
Taamatut oqaaseqarnerat 2000-ip nalaani tunngaviusumik inatsisissamik suliaqarnermi Savalimmiunut oqariartuutigineqartup assingaa. Savalimmiormiut suliaanni Savalimmiut taarsiullugu Danmarkimi tunngaviusumik inatsisip iluaniittumik inatsisissatut siunnersuummik suliaqalerput.
Naalakkersuisut siulittaasuata oqarnera naapertorlugu tunngaviusumik inatsisissatut siunnersuummik sulinerup qanoq ingerlateqqinneqarnissaanut Inatsisartut aalajangiissapput.