Ministerit uku Kalaallit Nunaannut pingaaruteqarput
Danmarkip suliassaqarfippassuit Kalaallit Nunaannut suliarisarai. Ministerit nutaat arlallit Kalaallit Nunaanut tunngasunut suliaqarnissaannik tamanna isumaqarpoq.
Namminersornermut inatsit naapertorlugu suliassaqarfiit 31-t Kalaallit Nunaata tigusinnaavai, kisianni maannamut Danmarkimit ingerlanneqartut. Tamatuma saniatigut illersornissamut nunanut allanullu politikki, namminersorneq pillugu inatsit naapertorlugu tiguneqarsinnaanngitsoq.
Tamatuma saniatigut suliassaqarfippassuarni Kalaallit Nunaat aamma Danmark suleqatigiissuteqarput. Maanna meeqqanut eqqugaaratarsinnaasunut ikiorsiinissaq pineqarpoq, tassani Naalakkersuisut Danmarkimit ikiorneqarnissamik qinnuiginninnissaat suliakkiissutigineqarnikuuvoq.
Ministerit uku Kalaallit Nunaanni maluginiarneqarsinnaapput:
Nick Hækkerup, inatsisinik atuutsitsinermut ministeri: Suliassaqarfinni suli Danmarkimit ingerlanneqartuni annertunerpaaq. Politiit, eqqartuussiviit aamma paarnaarussiviit suliassqarfigalugit, innuttaasunut amerlasuunut pingaaruteqartoq.
Nicolai Wammen, aningaasaqarnermut ministeri: Aningaasanut inatsisissamut isumaqatiginninniarnerit ingerlattassavai, danskit suliassaqarfiinut saniatigut aningaasaliisoqartassanersoq tassani aalajangerneqartassaaq.
Jeppe Kofod, nunanut allanut tunngasunut ministeri: Nunanut allanut politikki Danmarkimit aqunneqarpoq. Tassani Naalakkersuisut aamma nunanut allanut tunngasunut ministerip akornanni qanimut suleqatigiinnissaq pingaaruteqarpoq, kalaallit soqutigisaat suliarineqassappata.
Trine Bramsen, illersornermut ministeri: Tassani nunanut allanut tunngasunut ministeri assigaa.
Astrid Krag, isumaginninnermut ministerit: Danmark aamma Kalaallit Nunaat isumaginninnikkut sulianik arlalitsigut suleqatigeereerput. Ulluni aggersuni Naalakkersuisut meeqqat eqqugaaratarsinnaasut ikiorserneqarnissaannik Danmarkimut qinnuiginnittussaapput.
Dan Jørgensen, silap pissusianut, nukissiornermut pilersuinermullu ministeri.
Mette Frederiksen, ministeriuneq: Taanna soorunami Naalakkersuisut siulittaasuannut toqqaannartumik attaveqassaaq. Taakku attaveqatigiinnerat aalajangiisuusorujussuusoq oqaluttuarisaanerup takutippaa. Helle Thorning Schmidtip aamma Aleqa Hammondip akornanni attaveqatigiinneq taamani pitsaanngilaq. Lars Løkke Rasmussenip aamma Kim Kielsenip attaveqatigiinnerat tatigeqatigiikkiartornermik ineriartortitsiffiuvoq. Suliassaqarfippassuit Kalaallit Nunaannut pingaaruteqartut akimut suleqatigiiffiupput, tassani ministeriunerup ataqatigiissaarinissaa aalajangiisuusarpoq.