Ministeri: Piginnaasanik annertusaanissaq piviusunngortinneqassappat kalaallinit akuerineqartariaqarpoq

Inuiaqatigiinnut oqartussaaqataanermilu naleqartitat ulorianartorsiortinneqarput - aamma Issittumi, Danmarkimi illersornissamut ministeri, Naalakkersuisut Issittumi Illersornissamik annertusaanissaq pillugu danskit isumaqatigiissutaannut milliardinik nalilimmut qularnartoqartitsillutik oqaaseqareersut oqarpoq.

Naalakkersuisut Kalaallit Nunaanni Illersornissaqarfimmik nukittorsaaniarluni danskit isumaqatigiissutaannut akerliussappata, isumaqatigiissut atuutsinneqassanngilaq. Taamatut Danmarkimi Illersornissamut ministeri Trine Bramsen (Soc) Sermisiaq,AG-mut allakkatigut akissuteqarnermini ilisimatitsissuteqarpoq.

Taassumali ilanngullugu oqaatigaa, Issittumi inuiaqatiginnut oqartussaaqataanermullu ulorianartorsiortitsinermut isumaqatigiissut sammitinneqartoq.

- Isumaqatigiissummi erseqqissumik allassimasutut, isumaqatigiissutip piviusunngortinneqarnissaanut Kalaallit Nunaanni Savalimmiunilu politikkikkut tapersersuisoqarnissaa pisariaqartoq. Taamaammat taakku tamatumunnga isumaqataanngippata ilinniartitaanissaq suliffissalu nutaat pilersinneqassanngillat.

- Eqqaamaneqartariaqarporli inuiaqatigiinnut oqartussaaqataanerilu naleqartitat ulorianartorsiortinneqarmata – aamma Issittumi. Tamannarpiaavorlu isumaqatigiissuteqarnermut tunngaviusoq, Trine Bramsen oqarpoq.

Naalakkersuisoq: Soqutiginninngilagut

Piginnaasanik annertusaaniarneq oqallisigineqarsimaqaaq, nakkutilliinermi droninik ungasissumut ingerlasinnaasunik atuisoqarlunilu Kalaallit Nunaanni illersornissamut ilinniartitsisalertoqarniarmat, pineqatullu Naalakkersuisut Kalaallit Nunaanni sakkulersortoqannginnissaa illugu periusissiaannut naapertuutinngillat.

Nunanut allanut naalakkersuisup Pele Brobergip (N) tamanna TV2-mit apersorneqarnermini erseqqissaatigisimavaa:

- Sakkulersortoqannginnissaa pillugu erseqqissumik periusissiaqarpugut, aamma Kalaallit Nunaanni droninik atuisoqarnissaa, illersornissamut ilinniartitsisoqarnissaa danskillu sakkutuuisa Kalaallit Nunaanniisinneqarnissaat soqutigisarinngilarut, Pele Broberg tv-kkut aallakaatitsisarfimmut oqarpoq.

Tullissaanik isumaqatiginninniarnermi piginnaasanik annertusaanissaq Kalaallit Nunaanni piviusunngortinneqarsinnaanersoq erseqqissaassutigineqassaaq, tamannalu Naalakkersuisunngortut nutaat suliassaraat.

Illersornissamut ilinniartitsisoqarnissaa kalaallinit kissaatigineqarsimasoq

Trine Bramsenip ilisimatitsissutigaa, Naalakkersuisuusimasut piginnaasanik annertusaanissap suliarineqarneranut peqataatinneqarsimasut, aamma naalakkersuisut kissaateqarnerisigut illersornissamut ilinniartitsisarnissaq ilanngunneqarsimasoq:

- Suliniutit arlallit Naalakkersuisut kissaateqarnerisigut ilanngunneqarsimapput - ilaatigut ilinniartitsinikkut kalaallit inuusuttut amerlanerit sillimaniarnerup iluani linniagaqarnissamut periarfissinniarlugit. Soorlu isumaqatigiissummi anguniagaasoq, najukkami paasissutissanik suliaqartoqartarnissaa, taamalu suliffissaqartitsisoqarlunilu pingaarutilinnik ilisimasaqalertoqassalluni, Trine Bramsen oqarpoq.

Trine Bramsenip ilannguallugu oqaatigaa, Issittumi sillimaniarnikkut unammilligassat pillugit naalakersuisunngorlaaq oqaloqatigilluartarlugu.

Naalakkersuisoq Pele Broberg Sermitsiaq.AG-mut oqarpoq, nammineq taamatut aamma misigisimalluni, aamma Naalakkersuisut isumaqatiginninniarnermi ilaatigut sakkutuutut ilinniartitsinissat inuinnarnut sammitinneqarnerusumik ilinniartitsinissanut allanngortinniarniaraat.

- Danmarkimi illersornissamut ministeri Trine Bramsen maannakkorpiaq oqaloqatigilluartarpara, Pele Broberg Københavnimi naalagaaffeqatigiit ataatsimiinnissaat sioqqullugu oqarpoq.

Powered by Labrador CMS