Ministeri: Mittarfiup iluarsaanneqarnissaa uninngatinneqarpoq

Mittarfiit nutaat marluk 2024-mi piareerpata, Illersornissaqarfiup Kangerlussuarmi Mittarfiup suli atuinissaanik Naalakkersuisut danskillu naalakkersuisuisa akornanni pingaarnertut isumaqatigiissuteqarnerannit, maanna ukiut marluk qaangiutereerput.

Illersornissaqarfiup mittarfik atussagaa danskit naalakkersuisui oqarnikuupput, mittarfillu pisoqaliartortoq iluarsaanneqassappat Danmarkip akilissagaa aamma pilersaarutaavoq.

Iluarsartuunneqarnissaanulli aalajangersimasunik pilersaaruteqartoqanngilaq, upernaarlu Inatsisartunut qinersisoqarneranit sulineq uninngasimavoq. Danskit illersornissamut ministeriat Trine Bramsen (Soc.) Folketingimi ilaasortamut Aki-Matilda Høegh-Damimut (S) akissutini arlalinni taama ilisimatitsivoq.

Pilersaarusiornermik suliap qaammatini aggersuni aallarteqqinneqarnissaa naatsorsuutigineqarpoq, taamaattumillu Kangerlussuarmi Mittarfiup iluarsaanneqarnissaanut pilersaarutit oqaaseqarfigineqarsinnaanngillat, ministeri ilisimatitsivoq.

Naalakkersuisoq: Teknikkikkut misissuisoqarpoq
Nunatsinnili siumut ingerlasoqartoq Naalakkersuisut oqaluttuarput. Tamanna aggustimi saqqummiunneqarpoq, tassani attaveqarnermut naalakkersuisuusimasoq Naaja Nathanielsen (IA) ilisimatitsivoq, kalaallit tungaannit mittarfiup iluarsaanneqarnissaanik pisariaqartitsineq teknikkikkut misissorneqartoq. Tassanilu aamma Illersornissaqarfik akiliisussaagaluartoq, Mittarfeqarfiit iluarsaassinermi sanatitsisuussasut naalakkersuisoq oqaluttuarpoq.

Aki-Matilda Høegh-Dam ministerimut apeqquteqarnermini, Kangerlussuarmi mittarfik sakkutuuginnarnit atorneqartassanerannik danskit naalakkersuisui pilersaaruteqarnersut aamma apeqquteqarpoq.

Illersornissamut ministerip taamaattoqannginnerarpaa, 2019-imilu isumaqatigiissummut innersuussilluni: Det afviser forsvarsministeren, der henviser til aftalen fra 2019:

Sakkutuujunngitsut atuinerat kalaallit oqartussaaffigaat
- Mittarfik aalajangersimasumik sakkutuut timmisartorinngisaannit atukkat nalinginnaasut atuuttut malillugit suli atorneqarsinnaassasoq, isumaqatigiissummi ilaatigut atuarneqarsinnaavoq, kalaallillu mittarfimmik piginnittuuginnassasut.

- Sakkutuujunngitsulli mittarfimmik atuinerat kalaallit oqartussaaffigigaat oqaatigineqartariaqarpoq, Trine Bramsen, Aki-Matilda Høegh-Damimut allappoq.

Politikerip sakkutuunngorniarluni ilinniarneq, Folketingip danskillu naalakkersuisuisa aningaasaliiffigisaat pillugu paasisaqarnerorusuppoq. Ilinniagaq Issittumi piginnaasanik annertusaanissamut ilaavoq, nunanut allanut naalakkersuisuusimasup Pele Brobergip (N), Naalakkersuisut nutaat pilersaarummik allanngortitsiserusunnerannik nalunaaruteqarmat, taanna ukiup aallartinnerani oqallisigineqangaatsiarpoq.

Ilinniarneq Naalakkersuisullu oqaluuserineqassaaq
Kangerlussuarmili sakkutuutut ilinniarfimmik suliniut aamma ingerlariaqqissimanngilaq, Trine Bramsen ilisimatitsivoq:

- Ilinniarfimmik suliaqarneq, siunertaanik, sinaakkutaanik, imarisaanik atugassanillu aalajangersaanerit ilanngullugit, Naalakkersuisunik Issittumi piginnaasanik annertusaanissamik tamakkiisumik oqaloqatigiissuteqarfigineqarnissamik utaqqitinneqarpoq.

Naalakkersuisut illersornissamik ilinniarnerup sakkutuujunngitsunut siunertaqarnissaa, Pele Brobergip (N) siornatigut ilisimatitsissutiginikuuaa.