Ministeri: - Amigaateqartorujussuulluta nassuerutigisariaqarparput
Danskit Kalaallit Nunaanni isumaginninnikkut suliassaqarfimmi suliniutaat, meeqqanik eqqugaaratarsinnaasunik sulinermi ilisimasanik amigaateqarnerujussuarmut matuseqataassapput, danskit isumaginninnermut utoqqarnullu ministeriat taama oqarpoq.
Meeqqani eqqugaaratarsinnaasunik sulinerup qanoq malinnaaffigineqarnissaa ajornartorsiorfiuvoq. Atugarliorneq pillugu nalunaarutiginninnerit amerliartorpat imaluunniit ikiliartorpat? Suliaq qassit suliarineqartarpat – minnerunngitsumillu qassit uninngatiinnarneqartarpat?
Nunatsinni meeqqat eqqugaaratarsinnaasut pillugit pitsanngorsaaniarluni danskit kalaallillu suleqatigiinnerat killiffissiorniarlugu, suleqatigiissitat tamanna paasiniaraluarpaat.
Suleqatigiissitat nakkutiginiarneqartunit paasissutissat ikitsuinnaat pissarsiarisinnaasimavaat, kommunit paasissutissanik tunniussisinnaasimannginnerat pissutigalugu.
Danmarki suleqatigiinnermut 80 millionit koruuninik aningaasaliissuteqarpoq, ministerilu akisussaasoq oqarpoq, aningaasat ilaat suliassanik suliarinnittarnermi pitsaanerusumik nakkutiginnissinnaanermut atorneqassasut:
Iluarsiileruttortut
- Ukioq affakkaarlugu killiffilersuilluni nalunaarusiornikkut Kalaallit Nunaanni meeqqat eqqugaaratarsinnaasut atugaat pillugit ilisimasaqarnerulissaagut, eqqortumillu ikiuissagutta taakku pingaaruteqarput. Paasissutissat tunngaviusut amigartorujussuit nassuerutigisariaqarparput, tamannalu iluarsiiffiginialeruttorparput, Astrid Krag (Soc.), danskt isumaginninnermut utoqqarnullu ministeriat, allagaqarluni Sermitsiaq.AG-mut taama oqaaseqarpoq.
- Taamaammallu suliniutit arlallit ilaatigut kommunimi suliassanik suliarinnittarnerup kivinneqarnissaanut aamma suliassaqarfimmi ilisimasat paasissutissallu pitsaanerusut katersorniarlugit periusissiorluta. Ilaatigut ESDH-systemimik taaneqartartoq atulersinneqassaaq, taanna suliassanik suliarinnittarnermik assigiiaarnerulersitsissaaq, peqatigisaanillu kommunit IT-kkut paasissutissanik tunngavissaqalissaaq, taanna nangilluni oqarpoq.
Suleqatigiinnerup nalilersornissaanut tunngatillugu Astrid Krag ima oqarpoq:
- Nalunaarsuineq taanna arlaliusussanit aatsaat siulliuvoq, suliniullu aallarteqqammerpoq. Danskit naalakkersuisuisa suliniutit ineriartornerallu qanimut malinnaaffigaat. Minnerunngitsumik paasissutissanik pitsaanerusunik tunngavissaqalissaagut, inassuteqaateqarfigisassanik – ilaatigut suliassanik suliarinnittarneq, aamma ESDH-systemi atulersinneqassapput.