Skip to main content

Minik: VM-imut anngutissagutta katerinnerusariaqarpugut

Kalaallit assammik arsarnermi nunanut allanut unammisartui VM-imut anngutissappata katerinnerusariaqartut Minik Dahl Høegh isumaqarpoq

Assammik arsartartut Mexicomi nunarsuarmi pissartanngorniunnissamut anngunniuteqataassapput aprilimi. Tassani ajugaasut Egyptenimut anngutissapput, tassani 2021-mi nunarsuarmi pissartanngorniuttoqassaaq.

- Anngunnissatsinnut periarfissaqarluarluta isumaqarpunga. Katereqqammerpugut, tassani immitsinnut sungiunniaqqaalaariarluta unammilluarpugut, Minik Dahl Høegh Sermitsiaq.AG-mut oqarpoq.

Taanna Ajax Københavnimi Danmarkimi 1. divisionimi unammisartuuvoq, maanna qulingiluaattut inissisimagallarlutik.

Suli tunniussassaqarluartoq

Kalaallit ukioq kingulleq Pan Am-imi Nuummi ingerlanneqartumi VM-imut anngutingajaavipput, bronzinnanniunnermi Chilemut ajorsalutik.

- Anngutinngilaarnermut uggorisarpara. Bronzinnanniunnermi Chilemut ajorsarnerput suli uggorisarpara. Taamaattoq unammersuaarneq nuannersorsuartut eqqaamasarpara, nuna tamakkerlugu ataatsimoortitsinerput nuannersutut eqqaamasarlugu. Nunanut allanut unammisartuuneq assammik arsartarninni pingaartinnerpaavara, taamaattumik nunanut allanut unammisartut tujuuluaraat atigaangakku piumassusinerujussuartarpunga. Suli tunniussassaqarluarlunga misigaanga, taamaattumik VM-imut anngunnissatsinnut sukataassaagut, oqaluttuarpoq.

Katerinnerit amerlanerusut

Mexicomut aallannginnermi nunanut allanut unammisartut katerinnerusariaqartut isumaqarpoq.

- Oktobarimi katerinninngitsinni kingullermik januaarimi katerippugut, sivisoorujussuuvoq katerinnginnerput. Januaarimi Mexicoliannginnitsinnilu katerinnissarput neriuutigaara.

- Nunat unammisassagut katereqattaartarput. Assersuutigalugu USA taasinnaavarput, taakku timersuut ineriartortisarpaat. Kattuffimmit iliuuseqartoqanngippat ineriartornermit katataasinnaavugut. Timersuut qanoq ineriartorteqqissanersoq ammasumik oqallittoqartariaqalerpoq - matussuseereerluni oqallittoqassanngitsoq neriuutiginngilara. Maannakkut matoqqasumik oqallittoqanngikkaluarpoq, kisianni oqallittoqartariaqalerpoq, Minik Dahl Høegh oqarpoq.

Tapiissutit annikillinikuupput

Elite Sport Greenlandip nunanut allanut unammisartunut tapiisarnerat annikillerujussuarsimasut kattuffiup siulittaasuata Jørgen Isak Olsenip Sermitsiaq.AG-mut ilisimatitsissutigaa.

- Taamaakkaluartoq sungiusaqatigiisitsinerit sapinngisamik aningaasaqartissinnaasagut aallaavigalugit katerisitsisarpugut. Sapinngisarput tamakkerlugu sungiusaasut peqatigalugit naapititsinerit amerlanerpaaffissaminni inissisimanissaat siulersuisuni aalajangiusimavarput sulissutigisarlutigulu. Aningaasaliisussanik tassuunatigut amigaateqarnerput uniffiginagu suliniuteqartuarnerput nuannaarutigivara, oqarpoq.

NACHC kattuffissuaq Kalaallit Nunaata ilaasortaaffigisaa aqqutigalugu inerisaanissamik suliassanik periarfissaqartut oqarpoq.

- Suliniutissat assigiinngitsut saqqummiunneqartaleruttorfiini maanna oqaaseqarfiginissaanut pissutissaqarsorinngilanga. Pingaartipparput meeqqat inuusuttullu ineriartortinneqartuarnissaanut suliniutinik ingerlatsisinnaanerput annertusarusuttuartaratsigu tassunga ilanngullugu inerisaanerit tamakkiisut. USA-mit pissutsit nunatsinni pissutsinut sanilliutissallugit nikingassuteqangaatsiarput. Uagut sapinngisarput malillugu ingerlatsissaagut inorsinnata eqqarsaatigilluakkamilli aallaavilerluta. Siulersuisuni tamanna tunngavigalugu suliniutissanik piareersaassaagut. Inerisitsinissaq siunertaralugu NACHC aqqutigalugu periarfissagut annertusarusukkatsigit, oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER