håndbold

Minik: Uteriittuuguit angusaqarluarsinnaavutit

Minik Dahl Høeghip assammik arsartarneq kingusissukkut aallartippaa. Kisianni taamanili timersuutini inuussutissarsiutigisinnaasimavaa

Minik Dahl Høegh isertitseriartoq

Minik Dahl Høeghip assammik arsartartutut inuussutissarsiuteqarnissaa pilersaarutaanngilluinnarsimagaluarpoq. Tassami aatsaat 18-inik ukioqalereerluni aatsaat assammik arsarneq najukkamini Qaqortumi misilippaa.

- Timersortarfimmiillunga ikinngutima ilaasa aperaanga sungiusaqataarusunnersunga. Piumarpianngikkaluarpunga, allallu aamma qinngasaarpaannga pikkorippallaannginnerarlunga. Ullormi tassani aalajangerpunga, allanit tamanit pikkorinnerulerniarlunga, DR.dk-mut oqaluttuarpoq, tassani Danmarkimi timersortartut pikkorinnerit allaaserineqarnerat saqqummiunneqaqattaarpoq.

Nunanut allanut unammisartut
Ukiup affaa qaangiuttoq Minik GM-imut peqataavoq, U-18-inilu nunanut allanut unammisartunut ilanngunneqarpoq. Kisianni allarluinnarmik atorfeqalernissaa suli pilersaarutaavoq.

Atuaruk: Minik Dahl Høegh nersorneqarluaqisoq

- Danmarkiliartussaavunga inatsisinik ilisimatusarneq ilinniagarilissallugu. Universitetimilu aallartippunga, kisianni saniatigut Århus GF-imi sungiusartarpunga. Tassanilu paasivara assammik arsarneq universitetilu ataatsikkut aallussinnaanagit.

Inatsisinik ilisimatusarneq taamaatikkaa
- Tassami inuussutissarsiutigalugu assammik arsartartuunermi tamaviaarnartuuvoq. Takutitsilluarniaannavittussaavutit. Tassami tamanna pillugu aningaasarsiaqarputit, Minik oqarpoq, taamaattumillu angajoqqaaminut sianertariaqarsimavoq, oqaatigaalu inatsisinik ilisimatusarneq taamaatillugu.

Oqaloqatigiinneq ajornaatsuinnaanngilaq, tassami angajoqqaavisa kissaatigaat ilinniakkani naammassissagaa. Kisianni naggataagut aalajangernera taperserpaat.

Powered by Labrador CMS