Skip to main content

Minik Rosing: Tapiissutit atorfissaqartinneqartuaannassapput

Kalaallit Nunanni aatsitassarsiortoqarnera namminiilivinnermik kinguneqarnavianngitsoq ilisimatuut nalunaarusiaanni saqqummiunneqarpoq

Nalunaarusiami 'Kalaallit Nunaannut iluaqutissat' ilisimatuut assigiinngisitaartunik tunuliaqutallit isumaqatigiissutigaat aatsitassarsiorneq uuliasiornerlu tassaalernavianngitsut Kalaallit Nunaata Danmarkimiit avissaarluni namminersulivinnissaanut aqqutissaq qaninnersiugassaq, naak tamanna qinikkat kalaallit amerlasuut neriuutigigaluaraat.

- Kalaallit Nunaata aningaasarsiornera assut najummassimanartorsiorpoq. Aatsitassanik piiaaneq siunissami Kalaallit Nunaannut pingaaruteqartussaagaluartoq, taamaattoq aatsitassarsiorneq kisimi isumalluutaasinnaanngilaq. Kalaallit Nunaata aningaasarsiornera inuisalu siammarsimassusiat pissutaallutik suliniutit assigiinngisitaartut arlaqartullu ataatsikkut atorfissaqartinneqassapput – naalagaaffiullu aningaasaliissutai piffissami suli sivisoorujussuarmi atorfissaqartinneqarallassapput, ilisimatuut ataatsimiititaliaata nalunaarusiortup siulittaasua, Ilisimatusarfiup siulersuisuini siulittaasuusoq Københavnillu Universitetiani professori, Minik Rosing, nassuiaavoq. 

Aatsitassarsiornerup malittarisassiuunneqarsimanera nalunaarusiami nersualaarneqarpoq, aatsitassanillu piiaaneq inuiaqatigiit siuarsaaneqarneranni ilumut iluaqutaasussaasoq uppernarsarneqarpoq. 

Nalunaarusimili ersersinneqarpoq aatsitassat assigiinngitsut ullumikkut ilisimaneqartut kisiisa tunngavigalugit aatsitassarsiornerup Kalaallit Nunaat aningaasarsiornikkut napatissinnaanngikkaa. 

Aatsitassarsiorneq aningaasarsiornikkut nappataasinnaassappat ingerlatat angisuut aqqaneq-marluk 2040-p tungaanut ingerlasariaqassapput, taakkunanngalu tallimat ataatsikkut ingerlasariaqassallutik. Ullumikkut ilisimaneqartut tunngavigalugit aatsitassarsiorfiusinnaasut angisuut arfiniliinnaapput, taakkulu napaniutigissallugit amigarput, ilisimatut naliliipput. Taakkulu tamaasa iluaqutiginiassagaluaraanniluunniit Danmarkip aningaasaliissutai pinngitsoorneqarsinnaassanngillat. 

Silatusaartumik iliussagaani arriitsumik ineriartortitsisariaqarpoq 

Ilisimatuut nalunaarusiaminni tikkuarpaat aatsitassarsiornermik ingerlatsinermi suliniutit ikittut piffissami sivisunngitsumi ingerlakkaanni iluatsitsisoqarsinnaasoq. 

Kalaallit Nunaanni aatsitassarsiornikkut aningaasatigullu imminut napatinnerup tungaasigut angorusunneqartut assigiinngitsorpassuarniit isigalugu ilisimatuut misissorsimavaat; nunap sananeqaataaniit avatangiisinut, nunatta avinngarusimanerata politikikkut sunniutai, inatsisilerineq, inuiaqatigiit sunnerneqartarnerat, aningaasarsiorneq allarpassuillu. 

Tamakkorpassuit tunngavigalugit Kalaallit Nunaata siunissami ingerlariarfigisinnaasai assigiinngitsut tallimat nalunaarusiami tikkuarneqarput, nunallu ataani pisuussutit nunamut tamavimmut ungasinnerusoq isigalugu iluaqutaalissappata immikkut isiginiartariaqartutut immikkoortut 21 tikkuarneqarlutik. 

- Pisuussutit uumaatsut inuiaqatigiinnut kinguneqarnerpaamik pitsaanerpaamillu iluaqutiginiassagaanni uagutsinniit isigalugu pitsaassaaq aatsitassarsiorfiit ataatsikkut ingerlasut amerlavallaartinngikkaanni, nunallu immikkoortuini killilersoqqissaarsimasuni inissillugit. Taamaalioraanni aatsitassarsiorfiit avatangiisinut inooriatsimullu kinguneri, pinngitsooratik malunniuttussat, ikinnerpaaffimminniitinneqarsinnaapput, ilisimatuut siulittaasuatoqarpoq. 

- Aatsitassarsiortitseriaatsip massakkut ingerlanneqartup (suliniutit angisoorujussuit sukkanerpaamik aallartinniarlugit) nunaqavissut tamakkuninnga ingerlatsinermi piginnaanernik ineriartortitsisinnaanerigaluat akornusissavaa, sukkavallaamimmi amerlavallaartunillu aallartitsinermi sulisussat amerlanerpaarpaat nunanit allanit tikisittariaqassammata. Tamatuma inuiaqatigiinnik iluaqusiinissaraluaq akornusissavaa. Taamaattumik isumaqarpugut mianersornerusumik ineriartortitsisoqartariaqartoq, Minik Rosing, ilisimatooqatini sinnerlugit oqarpoq. Aamma tikkuarpaa inuussutissarsiornikkut ingerlatat allat aatsitassanut attuumassuteqanngitsut Kalaallit Nunaata iluatsittumik siuariartornissaanut aqqutaalluarsinnaasut. 

Aaatsitassanit isertitat aningaasaateqarfiliuunnissaat pisariaqavippoq 

Ilisimatuut nalunaarusiaminni oqaatigaat aatsitassanit isertitat aningaasaateqarfimmut nakkartittarnissaat pisariaqarluinnartuussasoq. Kalaallit Nunaanni inatsisiliortoqareerpoq aatsitassanit isertitat ilaasa aningaasaateqarfimmut nakkartinneqartarnissaannik aalajangersaasumik, taamaaliornikkut nunap aningaasarsiornera patajaallisarneqassammat, aningaasaateqarfissarli pilersinniarlugu suli iliuuseqartoqanngilaq. 

- Isumaqarpugut aningaasaateqarfik pisariaqarluinnartoq. Pilersinniarnera pilertortumik aallartinneqanngippat aningaasanik ingerlatsinermi amigartoorutaalersussat matussuserniarnissaasa ajornakusoortorujussuanngornissaat ernumassutigaarput. Aatsitasarsiorfissat ilisimaneqartut imaat – imaappoq Kalaallit Nunaata aningaasaatai – nungukkaanni aningaasanillu aningaasaateqarfimmut immikkoortitsinani, taava kalaallit ullumikkut inuusut kinguaavi inuussutissaarutissapput, Minik Rosing nassuiaavoq. 

Nalunaarusiaq tamanut saqqummiunneqassaaq Ilimmarfimmi januaarip 25-ani nal. 10.00. Danmarkimi oqallisigineqassaaq Københavnip Universitetiata nalliuttorsiortarfiani februaarip 4-ani nal. 11.00. Aaqqissuussinerit tamarmik tamanut ammapput 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER