Minik Rosing Londonimi aaqqissuussamut peqataasoq
Nunarsuarmi silaannaap kissakkiartornera ernumanartumik sukkassuseqarpoq. Ujarassiooq Mnik Rosing aaqqissuussamut alutornartumut, nunarsuarmi inuiaqatigiinnut suaaruteqartussamut peqataavoq.
Ujarassiooq nunarsuarmi ilisarisimaneqarluartoq, professori Minik Rosing, aamma islandimiu/qallunaaq eqqumiitsuiortoq Olafur Eliasson, annertuunik eqqumiitsuliortarnerminit ilisimaneqartoq, marluullutik Londonimi marlunngorpat silap pissusiata allanngoriartornera pillugu akiuniarnermi oqariartuuteqarlutik eqeersaaniarput.
Taakku marluullutik eqqumiitsuliaq Ice Watch saqqummiutissavaat, tassa Nuup Kangerluanit iluliamernit angisuut, Tate Modernip saavani aamma Europami Bloombergip, amerikamiut nutaarsiassaqartitsiviat aningaaserivinnik sullissinermik immikkut suliaqartoq pissaaneqarluartup, pingaarnertut allaffeqarfiata eqqaani.Tassani pinngortitap iluliamernit pinngortitai piffissami aggersuumi uninngallutik nungunnissartik tikillugu aakkiartussapput.
Nunarsuaq kissattoq
Aaqqissuussap pissutaa uaneeqqamiippoq. Nunarsuaq kissakkiartorpoq, nunanit tamalaanit nikittoqanngippat aanna CO2-mik aniatitsinerup annikillinissaanut piumassuseqartoqanngippat, kissatsikkiartorneranillu unikkallarnissamut takussutissaqanngilaq, FN-ip nalunaarusiaata silap pissusianut tunngasumi kingullermi oqaatigineqarpoq, kissakkiartornera 1.5 gradimut unikaallatsinneqassappat, nunarsuarmi CO2-mik aningatitsineq 2030-mi affaannanngortinneqartariaqartoq.
- Piviusoq taanna soqutiginngitsuusaaginnarsinnaanngilarput. Piaartumik iliuuseqassaagut. Silap pissusiata allanngoriartornerani sunniutit annertuut killilersussagutsigit ukiut aqqaneq-marluk periarfissaraagut, Olafur Eliasson oqaluttuarpoq, taassuma sila pillugu iliuuseqarnissamut isumassarsiortitsiniarluni eqqumiitsuliaq Ice Watch, Minik Rosing peqatigalugu pilersippaa.
Sila pillugu iliuuseqarumasut ernumassuteqartut marluullutik Londonimi oqalugiartussat siornatigut iluliaminernik saqqummersitsereernikuupput. Siullermik Københavnimi 2014-imi. Tulliani Parisimi 2015-imi. Maannakkullu annertunerusumik malunniuteqartumi Londonimi saqqummersitsissapput.
Iluliamernit Nuup Kangerluani qaqinneqarput. Ilaatigut Kuupik Kleist aamma allat nunarsuup siunissaanut ernumassuteqarlutik suliniuteqartunit ikiorserneqarput. Tamatuma kingorna iluliamernit Royal Arctic Linemit Londoniliaanneqarput.