Minik Israelimi klubbimit soqutigineqartoq
Assammik arsartartoq Minik Dahl Høegh suli klubbissaminik nassaanngilaq. Maannali sumi unammisartunngussanerluni ujartuileruttorpoq
Minik Dahl Høegh sumi unammisartunngussanerluni suli nalugallarpaa.
Israelimi timersoqatigiiffiit ilaat isumaqatiginninniarfigisimagaluarlugu Sermitsiaq.AG-mut ilisimatitsivoq, coronavirusili pissutaalluni isumaqatiginninniarnerit taamaatinneqarput.
- Israelimut nuussinnaanera mattutinngilara, tassami suli oqaloqatigiittarpugut. Maannali toqqaannartumik isumaqatiginninnianngilagut, taamaattoq piffissami qanittumi klubbitaarsinnaanera upperaara, Minik Dahl Høegh oqarpoq.
Qaqortumi aasarsiorneq
Aasaq manna ulapaarsimalluni oqarpoq.
- Suliffeqarfimmik Høegh VVS ApS-imik pilersitsinikuuvugut, taanna ulapputiginikuuarput. Maanna sumi unammisartuulissanerlunga misissuileruttorpunga, oqarpoq.
Angusaqarluartunukarusuttoq
Maanna tassa sumi unammisartuulissanerluni misissuileruttorpoq.
- Danmarkimi aamma Europami unammisartunngorsinnaaninnut ammavunga, kisianni ilaquttakka aamma tassunga apeqqutaaqataassapput. Frankrigimit Hollandimiillu coronap aallartinnginnerani soqutiginnittoqaraluarpoq. Kisianni oqarusuppunga angusaqarluarusuttuni unammisartoorukkama, Minik Dahl Høegh oqarpoq.
Taanna 2008-imi Danmarkimi unammisartunngorpoq, klubbit arlariit unammisartuuffigereerlugit.