Minik isertitsinerpaasoralugu unammineq pissanganaqisoq

Tallimanngormat unnukkut GOG-p Hånboldliga-mi normu 4-tut inissisimanini attatiinnarpaa, Nordsjælland Håndboldilu Angutimmarik Kreutzmannimik unammisartulik ajorsarpoq

Minik Dahl Høegh isertitseriarpoq.

Tallimanngormat unnukkut Holstebromi unammisarfimmi alutornaqisumi Gråkjær Arena-mi isiginnaartut 2178-iupput. Angerlarsimaffimminni unammisut isiginnaartuilu akiniaaniarput, klubbit taakkua marluk siusinnerusukkut pokalinnanniulluni unammiuaarnermi kvartfinalimi unammineranni Team Tvis Holstebro ajorsarujussuarnikuummat.
Holstebromi unammineq minutsini 60-ini tamani pissanganartorujussuarmik tamaviaarlunilu unammiffiuvoq. Team Tvis Holstebro marlunngormat unnukkut nikanarsarneqanngilaq affarmillu akiniaalluni, unammineq 29-29-mik inerneqarmat.
Unammineq aallartiinnavissoq tamaviaartoqarpoq akerariit tamarmik kusanartumik saassussisaqattaartarlutik. Håndboldliga-mi siuttunut ilaasut, normu 4-p normu 5-illu, unamminerat pissanganarluinnartoq. Unamminerup immikkoortua siulleq naligiiffiusorujussuuvoq. Muminnermi GOG ajuunnernmik ataatsimik siuaqqavoq 13-12-imik.
Unamminerup immikkoortuata aappaani GOG piffissat ilaani unammilluarnersaasarpoq. Immikkoortup aappaani minutsit qulit ingerlareersut 19-14-imik siuarsimavoq. Team Tvis Holstebro-li unamminermut uteqqippoq 22-22-mullu naligiisitsilerluni. Minutsini kingullerni GOG 27-25-mik siuarsimavoq. Periarfissarujussuaq maangaannartippaat. Straffertussaagaluartut straffertinneqanngillat, taavalu Team Tvis Holstebro unamminerup inerneranut 27-27-mut isertitsivoq. Minik Dahl Høegh unammineq naalersoq arlaleriarluni aalajangiisuusumik isertitseriartaraluarpoq, assersuisunilli sakkortoorujussuarnit unitsinneqartarluni.
Manik Dahl Høegh isertitsinersaavoq
Minik Dahl Høegh unamminerup ilarujussua peqataavoq. GOG-mi isertitsinersaavoq tallimanik iseritsilluni, Team Tvis Holstebro-llu assersuisuinik eqqissisimanngitsitsiuarluni. GOG-mi kalaaleq nunanut allanut unammisartoq alla Akutaaneq Kreutzmann piffissani unammiffimmut avalattarnermini ajornartorsiukujuttarpoq.
Sungiusaasuunerup Jakob Larsenip naligiiginnarneq assigiinngitsunik misigisaqarfigaa. Jakob Larsen Sermitsiaq.AG-mut ilaatigut oqarpoq:
– Maannakkorpiaq pakatsinerugunarpunga. Immikkoortup aappaani piffissap ilaani isertitsinernik tallimanik siuarsimavugut unamminerullu naalernerani isertitsinernik marlunnik siuarsimalluta. Periuarfissarujussuaq annaavarput ajugaassutaasinnaagaluartoq, taavalu strafferluta isertitseriarnissatsinnik arsaarneqarpugut. Aappaatigut minutsimi kingullermi suut tamaasa maangaannartingajappavut ajorsarsimasinnaagaluarlutalu, taamaattumik eqqissiguma unamminerlu video-kutd takoqqereerukku ataatsimik pointinnannerput naammagisimaassagunarpara.
Unamminerit qulingiluat ingerlanneqareersut GOG kakkaginartumik normu 4-aavoq 12 pointeqarluni.

Angutimmarik Kreutzmann
Arfininngormat ualikkut Angutimmarik Kreutzmann Kalaallit Nunaannit nunanut allanut unammisartut pingajoraat Håndboldliga-mi unammeqataasut. Nordsjælland Håndbold-ip siuttut KIF Kolding København Brøndby Hallenimi unammivaa.
Unammineq sioqqullugu KIF Kolding København suli ajugaaffigineqarsimanngilaq, sulilu taamaappoq. Angutimmarik Kreutzmann unammisartoqataalu 29-24-mik ajorsarput.
Nordsjælland Håndbold akiuulluartorujussuuvoq unamminerullu ilarujussua KIF Kolding Københavnimi unammisartut tusaamasat tatisarlugit.
– Akeqqanut sukalasuunut unammilluaraluaqaagut, Amngutimmarik Kreutzmann unamminerup kingorna Sermitsiaq.AG-mut oqarpoq nangillunilu:
– 22-22-mut anngukkaluarpugut. Tamatumali kingorna marloriarluni anisitaasoqarpugut, minutsinilu sisamani taakkunani ikinnerunitsinni unammineq aalajangerneqarpoq.
Angutimmarik Kreutzmann, serbiamiu Luka Mitrovic-ilu saamerlermi back-iusartoq, ataatsimik isertitsivoq.
Unamminerup kingorna Nordsjælland Håndbold Håndboldliga-mi normu 11-uvoq tallimanik pointeqarluni.

Powered by Labrador CMS