Minik Høegh-Damip amerlanerussutilerneqarnera isasoorpoq
Avannaata Kommuniani Siumup gruppiata Minik Høegh-Dam tunuliaqutsersinnaajunnaarpaat, politikeri ikiaroornartoq pillugu inatsimmik unioqqutitsisimasutut unnerluunneqarluni Nunatta Eqqartuussiviani sassartinneqartussaasoq paasineqarmat.
Minik Høegh-Dam Avannaata Kommuniani Siumut gruppianit tapersersorneqarunnaarpoq, taamaasillunilu Palle Jerimiassen kingoraarlugu borgmesterinngornissaminut periarfissaminik annaasaqarluni.
Bernhardt Olsen Siumumi siulersuisuunerni ilaasortaq, Avannaata Kommunianilu isumaqatiginninniarnernut tunngatillugu oqaaseqartartoq, Sermitsiaq.AG-mut taama uppernarsaavoq.
- Siumut gruppia aalajangerpoq Minik Høegh-Dam borgmesterissatut tunuliaqutsersoqqissinnaanagu, Bernhardt Olsen Sermitsiaq.AG-mut oqarpoq.
- Tunngavilersuutaavoq paasissutissat nutaat, tusagassiorfitsigut paasisagut, maanna pigileratsigit. Paasissutissat pisagut allanngorujussuaramik, nassuiaavoq.
Minik Høegh-Dam kommunimut qinersinermi 406-inik taaneqarluni kommunimi taaneqarnerpaagaluarpoq.
Nunatta Eqqartuussiviani sassartinneqassaaq
Paasissutissat nutaa Avannaata Kommuniani Siumut gruppiata isumaqatiginninniarnerannut tunngatillugu oqaaseqartartup pisai ikiaroornartoq pillugu inatsimmik unioqqutitsisimanermik unnerluussinerit, Nunatta Eqqartuussivianut suliassanngorteqqinneqarsimasut. Minik Høegh-Dam Sermersuumi eqqartuussivimmi 25. marts sassartinneqarpoq, ikiaroornartoq pillugu inatsimmik unioqqutitsisimasutut unnerluunneqarluni.
Minik Høegh-Damip angerlarsimaffiani politiit 2018-imi ujaasinerminni aningaasanik 154.805 koruuninik nassaarput. Taakkunannga 151.900 koruunit isarussat puuannut imullugit toqqorneqarsimasut nassaarineqarlutik. Aningaasat ikiaroornartumik tuniniaanermit pissarsiaassangatinneqarput.
Høegh-Damili eqqartuussivimmi sassartinneqarami pinngitsuutinneqarpoq. Taamaattoq suliassaq unnerluussisussaatitaasumit Nunatta Eqqartuussivianut suliassanngorteqqillugu ingerlateqqippaa.
Kinami issiassava
Siumut gruppia kommunimut qinersinermi katillugit taajuunneqarnerpaasimasoq borgmesterinngortitsinissamut maanna ujartuilluni oqaloqatiginnissaaq.
Siumumi periuserineqarpoq qinersinermi taaneqarnerpaaq borgmesterissatut innersuunneqassasoq taamatullu isumaqatiginninniarnernik aqutsissasoq. Pisumili Minik Høegh-Dam tapersersorneqanngilaq, soorlu aamma Palle Jerimiassen partiimit anisimasoq. Taamaammat Sakio Flesicher tullertut innersuunneqartussatut inissisimavoq.
Sakio Flesicher qinigaaffimmi matumani 1. viceborgmesteritut inissisimavoq, qinersinermilu nutaami 135-nit taaneqarsimalluni.