Minik Høegh-Dam pillugu suliaq kinguarteqqinneqartoq

Minik Høegh-Dam suli utaqqisinnaassuseqarniartariaqarpoq. Taanna pillugu suliassanngorteqqitaq Nunatta Eqqartuussiviani Ilulissani ullumi aallartittoq, juunip 23-anut kinguartinneqarpoq. Kalaallit Nunaanni Politiit unnerluussisussaatitaanerat, Martin Strandby Nielsen, Sermitsiaq.AG-mut taama ilisimatitsivoq.

Eqqartuussineq ullumikkut Nunatta Eqqartuussiviani suliarineqartussaagaluarpoq. Suliarli juunip 23-anut kinguartinneqarpoq.

Ukiuni arlalinni ikiaroornartoq pillugu inatsimmik unioqqutitsisimasutut pasineqarnermini suliap inaarutaasumik naammassineqarnissaa utaqqereerlugu, kommunalbestyrelsimut ilaasortap Minik Høegh-Damip naammassinnittoqarnissaa utaqqeqqittariaqarpaa.

Eqqartuussineq pilersaarutit malillugit tallimanngornermi ullaakkut Nunatta Eqqartuussiviani Ilulissani aallartippoq.

Illuatungeriilli angusaqarpallaannginneranni illersuisut akerliliinissaata suliarineqarnissaa eqqartuussisup kinguartippaa.

Unnerluussisussaatitaasoq naapertorlugu suliamut tunngasumik akerliliinermut tunngavoq, taanna eqqartuussinerup ingerlanneqannginnerani suliarineqartussaavoq. Tamanna 23. juni pissaaq.

Akerliliinerup suliarineqarnissaanut piareersarnissamut piffissaqarluarnissamik pisariaqartitsisoqartoq, Minik Høegh-Damip illersuisua Finn Meinel ilisimatitsivoq.

Illersuisup akerliliinermik qaqugu saqqummiussinissaa aamma sumut tunnganera, illersuisup imaluunniit unnerluussisussaatitaasup oqaatigisinnaanngilaat.

Powered by Labrador CMS