assammik arsaanneq
Minik Dahl Høegh Skanderborg Håndboldimut nuuppoq
Nunanut allanut unammisartoq Skanderborg Håndbold sæsonip naammassinissaata tungaanut isumaqatigiissuteqarfigisimallugu sisamanngornermi nunatta nalunaaqutaa malillugu ualisoq allappoq
Taamaasilluni assammik arsaattartoq Minik Dahl Høegh piffissami sivisuumi aqqunaqqareerluni qaammatini kingullerni unammeqataasaqqilernissamik piareersarsimasup ingerlaannaq atuutilertumik Århus Håndboldimiik Skanderborg Håndboldimut nuuppoq.
Novembarimiilli soqutiginnittut
Skanderborg Håndboldip novembarip qaammataaniilli Minik Dahl Høegh isumaqatigiissuteqarfiginiarsimangaluarpaa, massakkulli iluatsippoq.
- Amerikap nunavittaani assammik arsarluni pissartanngorniuttoqarnissaata tungaanut unammisaqattaarumallunga taamatut iliorpunga, Nuummilu juunip qaammataani nunarsuaq tammakkerlugu pissartanngorniunnernut annguteriarnissatsinni pitsaanerpaaffinniikkusullunga, Minik Dahl Høegh Sermitsiaq.AG-mut oqarpoq.
- Tassa, Århus Håndboldimut isumaqatigiissutinga atorunnaarpoq, Århus Håndboldimilu isumaqatigiissutigineqartut malillugit Skanderborg Håndboldimi ingerlaqqissaanga. Skanderborg Håndbold europami pissatanngorniunnerit patsisigalugit Håndboldligaenimi unillatsiarnerup siuliani ingerlalluarsimapput, taamaammat pissagarlunilu nuannissaaq, Minik Dahl Høegh oqarpoq.
Aqagu Savalimmiunut aallarniartoq
Minik Dahl Høegh sisamanngornermi kingusinnerusukku Skanderborg Håndboldimi unammisartuinut ilisaritinneqassaaq.
Minik Dahl Høegh aqagu, tallimanngornermi, nunanut allanut unammisartut, Savalimmiuni sungiusartut ornissavai. Aqqunaqqaneq iluarsilerpoq. Minik Dahl Høeghilu assammik unammeqataasaleqqissinnaanera, nakorsat akuerisimavaat.
- Apuukkuma nunanut allanut unammisartoqatikka akunnialunni sungiusaqatigisinnaassallugit naatsorsuutigaara, Minik Dahl Høegh nuannaarluni oqarpoq.
Kalaaleq alla Håndboldligaenimi unammisartoq, Akutaaneq Kreutzmann tallimanngorpat aamma Savalimmiunukassaaq.