Mimip 80 mio. kr. illersorpai: Aningaasat makkununnga atorneqarput

Tusagassiuutinut nalunaarummi 'Taakku 80 mio.kr.-it soorunami meeqqanut atorneqassapput'-mik qulequtalimmi, meeqqanut inuusuttunullu naalakkersuisup Mimi Karlsenip (IA) kalaallit qallunaalu isumaginninnikkut suleqatigiinnerannut isornartorsiuinermut akissuteqarpoq.

Suleqatigiinneq arlaleriarluni isornartorsiorneqarnikuuvoq, pingaartumik Nuummi Isumaginninnermut Aqutsisoqarfimmut iluaqutaanerunerarlugu, aqutsisoqarfimmi sulisut amerleriarmata.

Naalakkersuisut noqqaanerisa kingorna Danmark suleqatigiinnermut 80 millionit koruuninik aningaasaliivoq, tamatumalu saniatigut Nunatta Karsiani aningaasaliisoqarpoq. (Allaaserisap naqqani aningaasat sumut atorneqarsimanersut takuneqarsinnaavoq)

Meeqqanut inuusuttunullu suliniutit nukittorsarneqarnerannik suliaqarneq ingerlasoq, aamma siumut ingerlasoqartoq, Mimi Karlsen oqarpoq:

Sulisut nutaat piumasaqaataapput

– Tassa maanna inernernik takusaqarsinnaalereerpugut. Sumiginnaasarnermik akiuiniarnermi meeqqanillu kinguaassiutitigut atornerluisarnerup akiorniarnerani annertuumik allorialeruttorpugut.

Isumaginninnermut Aqutsisoqarfiup sulisuisa amerlinerannut tunngatillugu, suliniuteqarneq inunnik suliamut piginnaasaqartunik pisariaqartitsisoq, Mimi Karlsen oqarpoq.

- Isumaginninnermut Aqutsisoqarfik - nammineq sulisumi qaavatigut - pilersaarusiornernut atorfinnut sulisussanik pilerisutsitsilersitsisinnaalersimavoq.

Taamatut sulissuteqarnitsinni inernernik angusaqarnissaq tunaartarineqarnikuuvoq. Pilersaarutit killilimmik piffissaligaapput, taamaammat pilersaarutaasimasut naammassippata sukataarutiginikuusat qanoq isilluta attatiinnarsinnaanerivut qanorlu ingerlatiinnarsinnaanerivut maannangaaq isumaliutersuutigisariaqarparput, Mimi Karlsen oqarpoq.

Aajap isornartorsiuinera

Folketingimut ilaasortaq Aaja Chemnitz kingullermik Isumaginninnermut Aqutsisoqarfimmi sulisut amerlinerat pillugu Folketingip juullip kingorna ammarneqarnerani isornartorsiorpaa:

- Kommunit naammanngitsunik sulianik suliaqartartoqanngippata iluaqutaasinnaanngilaq. Equngalersitsisoqarpoq, tamannalu siunissami pitsaanerusumik suliarisinnaallugu paasiinnartariaqarparput, Aaja Chemnitz (IA), suleqatigiinneq pillugu aperineqarami oqarpoq.

Sulinerulli ingerlanerani aamma ajornartorsiuteqartoqartoq, Mimi Karlsenip nassuerutigaa:

- Pilersaarutit tulleriiaaginnaavissut naammassisassat takkussuuttarnerat pissutaallutik, kommunit artukkerneqarsimasutut misigisarsimapput. Suleqatigiinneq ataqatigiissaarinerlu immaqa pitsaanerusinnaasimagaluarput, tamatta tamanna ilinniarfigisinnaavarput.

Aningaasat imatut agguataarneqarput

Kalaallit Nunaanni meeqqat inuusuttunillu inuuniarnermikkut atugarliortut sullinneqarnerinut patajaallisaatissatut 80 millioner koruuninik immikkoortortitaannit, Kalaallit Nunaat 69,9 mio. koruuninik pissarsisoq, Mimi Karlsen ilisimatitsivoq. Aningaasat sinneri danskit Isumaginninnermut Aqutsisoqarfiani Aqutsisoqarfimmilu linniartitsineq aammalu Pitsaassuseq (STUK) aammattaaq uuttortaasartoqatigiit suliniutaannik tapersersuinermut ingerlassapput, uuttortaasartoqatigiinnit kisitsisitigut malitseqartitsineq qulakkeerneqassalluni.

Kalaallit Nunaannut aningaasaliissutit suliniutinut makkununnga agguataarneqarput:

• Suliniut 1 – Manu angajoqqaanut pikkorissartitsineq: 4.489.300 kr.
• Suliniut 2 - najukkani kommunimi sulianik suliaqartartut peqqissaanermillu ilinniagaqarsimasutut suliaqartartut akornanni suleqatigiinneq patajaallisassavaa: 4.338.226 kr.
• Suliniut 3 - ulluunerani neqeroorutini sulisut piginnaasaanik qaffassaaneq aamma piginnaasanik inerisaaneq tapersersortussaavai: 5.851.630 kr.
• Suliniut 4 - kajumissutsimik sulinerup pitsaanerusumik sinaakkusersorneqarnissaanut iluaqutaassaaq: 4.099.119 kr.
• Suliniut 5 - kommunini meeqqat inuusuttullu pillugit suliat suliarineqanngitsut amerlassusaannik ikilisaataassaaq: 7.119.508 kr.
• Suliniut 6 - kommunini tallimani tamani sulianik suliarinnittarnermut periutsimik ataatsimoorussamik atulersitsinissaq suliassaraa: 9.591393 kr.
• Suliniut 7 - isumaginninnermi meeqqanut inuusuttunullu suliassaqarfimmi piginnaasanik qaffassaalluni pikkorissaanermik neqeroorutit pioreersut takussutissartaqalersissavai: 1.402.775 kr.
• Suliniut 8 - akissarsisoqarsimatillugu meeqqat unnukkut unnuakkullu sumiiffissaqarnissaannik qulakkeerinnissaaq: 5.903.662 kr.
• Suliniut 9 - nuna tamakkerlugu ilaqutariit illuisa 16-it pitsaassusaannik qaffassaallunilu ilaqutariit illuisa tamarmiusut ataatsimoorussamik sullisseriaaseqalernissaannik suliaqarnikkut nukittorsassavai: 1.908.191 kr.
• Suliniut 10 - meeqqat inuusuttullu kinguaassiuutimikkut kannguttaatsuliorfigineqarsimasut katsorsarneqarnissaannik neqeroorutit pitsanngorsassavai: 13.901.942 kr.
• Suliniut 16 - meeqqat inuusuttullu kinguaassiuutaannik kanngutsaatsuliorniartutut pissusilersortartut katsorsaaviannik Klinik Killiliisa-mik taaneqartartumik pilersitsivoq: 5.094.475 kr.
• Allaffissorneq: Nutserisut pingasut, suliniutinut tamanut ataqatigiissaarisut aamma Meeqqanut, Inuusuttunut Ilaqutariinnullu Naalakkersuisoqarfimmi allattoqarfimmi atorfik, aamma Danmarkimi Isumaginninnermut Aqutsisoqarfimmik suleqateqarneq: 6.266.674 kr.