KNR

Mimi: Naalakkersuisup iliuuseriniagai kisermaassiniarpalaartuuvoq

Ilinniartitaanermut naalakkersuisuusimasoq Mimi Karlsen IA naalakkersuisup Nick Nielsenip KNR-imut sornartorsiuinera oqaaseqarfigaa

- KNR suliffeqarfittut imminut pigisinnaanera misissoruk, inuiaqatigiillu tusagassiornermik sumulluunniit qilersorsimanngitsumut aqqutissiuullugit, Mimi Karlsen Nick Nielsenimut siunersuuteqarpoq

Ilinniartitaanermut, ilageeqarnermut, kultureqarnermut naligiissitaanermullu naalakkersuisup Nick Nielsenip Siumut KNR marlunngormat isornartorsiorpaa. Isornartorsiuinera ilinniartitaanermut naalakkersuisuusimasup Mimi Karlsenip IA oqaaseqarfigaa.

Nick Nielsenip KNR nammineerluni aqussinnaanera apeqqusernartoqartippaa.

- Ingerlatsivik imminut pigisutut ingerlanneqassappat, tamanna uanga paasinninnera naapertorlugu isumaqassaaq aningaasaqarnikkut pituuttat Namminersorlutik Oqartussanut atasut kittorarneqarnissaannik, Nick Nielsen nassuiaavoq. Suliami 'illuatungiliuttuusut naalakkersuisuutitaqarallaramik pissutissaqartissimanngimmassuk ingerlatseqatigiiffinni siulersuisunik toqqartuisarnermi periaatsinik allannguinissartik', Nick Nielsen nassuiaalluni.

Eqqunngitsumik isornartorsiuisoqartoq
Mimi Karlsen tassunga tunngatillugu ima oqarpoq:

- Nick Nielsen oqarnera Naalakkersuisut siulii KNR pillugu suliaqarsimasinnaagaluartut isumaqatigiginngilara, suliaqaqaagummi.

- Ukiorpassuanngortuni KNR Naalakkersuinikkut isumaqatigiissusiornikkullu aningaasalersorneqartartoq Naalakkersuisuunitsinni aamma suliaqarfigeqaarput.

- Ajornartorsiut angingaartoq, tassalu aningaasaliissutit 1-2 mio sipporlugit atuineq unitsinniarlugu iliuuseqartoqartariaqarmat iliuuseqarpugut. KNR-mi siulersuisut qanimut suleqatigalugit pilersaarusiortoqarpoq aningaasaqarneq ilorraap tungaanut aallartillugu, ilinniartitaanermut, ilageeqarnermut, kultureqarnermut naligiissitaanermullu naalakkersuisuusimasoq oqarpoq.

- Taasuma saniatigut arlaannulluunniit attuumassuteqanngitsumik misissuisitsivugut, taannalu aallaavigalugu inassuteqaatit assigiinngitsut takuneqarsinnaapput.

- Kultureqarnermut Naalakkersuisoqarfimmittaaq suliaraarput nalilersuineq. Nalilersuinermi missingersorneqarpoq KNR suliffeqarfittut imminut pigisoq qanoq iluseqarsinnaanersoq.

Kammalaatersortoqarpoq
Siunersuutigineqarsimasut malillugit sulisoqarnissaa Mimi Karlsenip siunersuutigaa.

- Nick Nielsen, suliat taakku piariikkat atoriaannaavatit ingerlateqqillugillu. Taakku ingerlateqqikkukkit KNR tusagassiorfittut Naalakkersuinikkut attuumassuteqanngitsumik suliffiusinnaasutut inississagaluarpat.

- Maanna iliuuseriniakkat kisermaassiniarpalaarneruvoq navianartoq. Siulersuisuni tallimani illit aalajangerniarpat kikkut sisamat tassaniissanersut. Tamanna tusagassiornerup Naalakkersuinikkut akuliuffigineqarneranik kinguneqassaaq.

- Inuiaqatigiit Naalakkersuinikkut kammalaatinik ikkussuinerat tatiginninnginnermik pilersitsereerpoq unitsittariaqarlunilu.

- Taamaammat KNR suliffeqarfittut imminut pigisinnaanera misissoruk, inuiaqatigiillu tusagassiornermik sumulluunniit qilersorsimanngitsumut aqqutissiuullugit, Mimi Karlsen Nick Nielsenimut siunersuuteqarpoq.

Powered by Labrador CMS