Mimi Karlsen: Nunavumut timmisartukkut aqquteqalerli
Naggueqatitsinnut attaveqarnerusariaqartugut Inuit Ataqatigiinnit Mimi Karlsen isumaqarpoq. Taamaattumik Nunavumut silaannakkut angallannikkut aqquteqalernissaa neriuutigaa
Nunavumut timmisartukkut aqquteqaleqqilernissaa arlalitsigut iluaqutitaqassasoq Mimi Karlsen isumaqarpoq.
Tassami periarfissat arlallit ammassasut isumaqarpoq.
- Naggueqatigiit Inuit nunanut sisamanut avinneqarsimavugut. Ulluinnarni immitsinnut tikeraarsinnaanngilagut. Kulturitsinnik oqaatsitsinnillu ineriartortitseqatigiissinnaanerput taamaalilluni killeqarpoq. Ilaqutariit Canadami Kalaallillu Nunaanni najugallit aningaasarpassuit atorlugit nunat allat aqqusaartoqqaarlugit aatsaat immitsinnut tikeraarsinnaavugut, siunnersuummini allappoq.
- Ullutsinni aatsitassarsiornermi suliaqartut suliaminnut tunngatillugu Canadap nunattalu akornanni angalaniat Danmark, imaluunniit Island aqqusaaqqaartariaqarpaat, uffa nunatsinniit Iqalunnut annerpaamik akunnerit marluk ingerlasinnaagaluarlutik. Silaannakkut Canadamut attaveqarneq niuernikkut ineriartortitsilluarsinnaavoq, Mimi Karlsen oqarpoq.
Iluaqutissat
- Siornatigut Iqalunnut timmisartukkut aqquteqareerpoq, sooruna ammaqqinneqartariaqartoq isumaqarpit?
- Aqquteqarallarmat angalasut amerlaneq ajorput, maannakkulli allarpassuarnik pisoqarnikuuvoq, soorlu maanna aatsitassat tungaatigut suliaqartoqartoq. Niueqatigiinnikkut kulturikkullu avitseqatigiinneq pitsaanerulersinniarlugit aqqut ammaqqinneqarsinnaavoq, Mimi Karlsen oqarpoq.
Canada isumaqatiginninniarfigineqarsinnaasoq
- Air Greenland timmisartukkut angallassisassasoq siunnersuutigaajuk?
- Air Greenlandiusinnaavoq aammali Canadami timmisartuutileqatigiiffiit una ingerlassinnaavaat. Canadamiut isumaqatiginninniarfigineqarsinnaassapput aqqutip ammarneqarnissaa eqqarsaatigalugu, oqarpoq.
Siunnersuutaa: Iqalunnut timmisartukkut pisortat aallarnigaannik aqquteqaqqilissappat tapeeriutsit assigiinngitsut qanoq ittut pisortanut, namminersortunut innuttaasunullu aningaasatigut kingunissaasa takussutissartaannik kingusinnerpaamik UKA2020-imi Inatsisartunut agguanneqartussamik Naalakkersuisut suliaqaqqullugit peqquneqarnissaannik Inatsisartut aalajangiiffigisassaattut siunnersuut.
Inatsisartuni oqallisigineqassaaq novembarip aqqaneq aappaani.