Mimi Karlsen: Kræfteqartut pillugit akerleriimmik akissuteqarsimaneq isummerfigerusunngikkaa
Peqqissutsimut naalakkersuisoq misiligummik katsorsaasoqartarnera pillugu erseqqissumik akissuteqanngilaq. Mimi Karlsenip oqaatigaa, peqqinnissaqarfik misiligummik katsorsaanissamut neqerooruteqartartoq, aamma tulleriiaarisarnermut ataatsimiititaliaq pillugu nalunaarut misissorniarlugu.
Kræfteqartut misiligummik katsorsarneqarsinnaappat imaluunniit katsorsarneqarsinnaanngillat?
Sermitsiaq.AG-mit kræfteqartup Naja Zeeb Pedersenip misiligummik katsorsarneqarnissamut Peqqinnissaqarfiup Tulleriiaarisarnermut Ataatsimiititaliaanit itigartinneqarsimaneranut atatillugu apeqquteqartoqarsimavoq.
Naja Zeeb Pedersen misiligummik katsorsarneqarnissamut Rigshospitalimit akuerineqarsimagaluarpoq. Tulleriiaarisarnermullu Ataatsimiititaliami siulittaasup Berit Bjerre Hansenip itigartitsinissamik aalajangiisimaneq attatiinnarpaa.
Itigartitsisoqarneranut atatillugu oqaatigisimavaa, Peqqinnissaqarfiup Tulleriiaarisarnermut Ataatsimiititaliaa misiligummik katsorsaanissamut tunngaviatigut neqerooruteqarneq ajortoq.
Oqaaseqarusunngitsoq
Peqqissutsimut naalakkersuisoq sapaatip-akunnerani kingullermi apersorneqarusussimanngilaq. Mimi Karlsenip apersorneqarnissaminut taarsiullugu tusagassiorfitsigut nalunaaruteqarnissaq toqqarsimavaa, nalunaaruteqarnerminilu ilisimatitsissutigaa, peqqinnissaqarfik misiligummik katsorsaanissamut tunngaviatigut neqerooruteqartartoq.
Taakkuli imminnut qanoq attuumassuteqarpat?
Sermitsiaq. AG-mit naalakkersuisoq tallimanngornermi oqaaseqartinneqarpoq.
Mimi Karlsenip erseqqissaassutigaa, nammineq tulleriiaarisarnermullu ataatsimiititaliap imminnut akerleriittunik akissuteqarsimanertik oqaaseqarfigerusunnagu.
Peqqissutsimulli naalakkersuisup ilisimatitsissutigaa, nalunaarummi qanoq periarfissaqarnersoq suullu allanngortinneqarsinnaanersut Peqqissutsimut Naalakkersuisoqarfik peqatigalugut misissorniarlugit.
- Danmarkimi neqeroorutigineqartartut assigannik katsorsaasoqartarnissaa pingaaruteqarluinnarpoq. Pissutsit ilaat aaqqiiffiginiarlugit sulissutigissavagut, Mimi Karlsen oqarpoq.
Paasiuminaatsut
Tulleriiaarisarnermut Ataatsimiititaliap - napparsimasoq misiligummik katsorsartinnissamut akuerineqareeraluartoq - kræfteqartunik misiligummik katsorsaanissamut itigartitsissuteqarsimanera naammaginarnersoq aperineqarami Mimi Karlsen oqarpoq tamanna oqaaseqarfigerusunnagu.
- Isumapungarpunga sulianut ataasiakkaanut sangusutit.
Anna Wangenheim (D) isumaqarpoq, nalunaarut Peqqinnissaqarfiup Tulleriiaarisarnermut Ataatsimiititaliaani malinneqartussaq pisoqalisimasoq. Taassuma ilanngullugu oqaatigaa, tulleriiaarisarnermut ataatsimiititaliami suliamut ilisimasallit nalunaarummi sumik malinnissanerlutik nalusaraat.
Mimi Karlsenip oqaatigaa - ilaatigut tamanna pissutigalugu - nalunaarutip Anna Wangenheimimut tulleriiaarisarnermulluunniit ataatsimiititaliamut inunnullu ataasiakkaanut suliaritittussanut nalunaarut paatsuugassaajunnaarlugu qanoq nutarterneqarsinnaanersoq misissorniarlugu.
Kræfteqartut tamarmik neriuuteqalersinnaasoq
Taamaakkaluartoq naalakkersuisup aalajangiussimallugu oqaatigaa, Kalaallit Nunaanni Peqqinnissaqarfik misiligummik katsorsaanissamut neqerooruteqartartoq.
Tamanna kræfteqartunut misiligummik katsorsartinnissamut itigartinneqarsimasunut neriuuteqartitsilissava?
- Pitsaanerusumik qanoq iliuuseqarsinnaanitta misissorneqarnera kræfteqartunut tamanut neriuuteqalersitsisinnaavoq. Neqeroorutigineqartartut - assersuutigalugu Danmarkimi - Naalagaaffeqatigiinni tamarmi atuuttussanngorlugit nutarterijuassaagut.
Mimi Karlsen peqqinnissaqarfimmut, tassuga ilanngullugu tulleriiaarisarnermut ataatsimiititaliamut akisussaasuusoq. Tamannalu tulleriiaarisarnermut ataatsimiititaliamut tatiginninnersoq tatiginninnginnersorluunniit - pillugu naalakkersuisumut apeqquteqarnissamut tunngavissiivoq - naalakkersuisumimmi oqaatigineqarpoq, peqqinnissaqarfik misiligummik katsorsaanissamut neqerooruteqartartoq, akerlianik tulleriiaarisarnermut ataatsimiititaliamit akerliusumik oqaaseqartut.
Mimi Karlsen tamanna pillugu oqaaseqarusunngilaq.
Taavami tulleriiaarisarnermut ataatsimiititaliaq oqaloqatiginiarpiuk?
- Taamaaliorpunga. Misissuinissarput piumasarinikuuara.
Mimi Karlsenip ilisimatitsissutigaa, tulleriiaarisarnermut ataatsimiititaliap suleriuserisartagaa oqaluuseriniarlugu peqqinnissaqarfimmi aqutsisut ataatsimeeqatiginissai pilersaarutigalugu.