Mimi Karlsen: Arlalitsigut ilungersunartorsiorpugut
Ilaqutariinnut peqqissutsimullu naalakkersuisup Mimi Karlsenip (IA), nunap immikkoortuani nakorsap Peter Vedstedip peqqissutsimut isumaginninnermi oqartussanik isornartorsiuineranut arlalitsigut nassuerutiginnippoq. Sorpassuarnik isornartorsiuineq sakkortooq, AG-mi sapaatip akunnerani kingullermi saqqummiunneqarpoq.
’Politikerit aatsaat isornartorsiuerujussuartoqaraangat saqqummertarput’, AG-p saqqaani sapaatip akunnerata siuliani taama allassimavoq. Nunap immikkoortuani nakorsaq Peter Vedsted, nunap immikkoortuani Avannaani aqutsisutut ukiuni tallimani atuuffini kingumut qiviarlugit taama oqaaseqarpoq.
Aviisi AG taama allappoq.
Oqaatigineqartut matukkut aniartornermi oqaatigineqarput. Ukiut tallimat taama atorfeqareerluni isumaqarpoq nukiit nutaat suliassamik tigusisariaqartut, suliffimmi ilaatigut sapaatip akunneranut nalunaaquttap akunnerini 60-70-ini suliffiusartumi.
Ilaqutariinnut peqqissutsimullu naalakkersuisup Mimi Karlsenip, Peter Vedstedip isornartorsiugai arlallit ilisarisinnaavai nassuerutigalugulu Nunatsinni napparsimmavinni ajornartorsiutit pitsaanerusumik iliuuseqarfigineqartariaqarnerat.
- Peqqissutsimik isumaginninneq ‘angakkuarnertut’ inngilaq. Sorpassuartigut ilungersunartorsiorpugut, soorlu nakorsassaaleqinermut atatillugu. Tamanna inissaqarniarnermut attuumassuteqarpoq tamatumalu saniatigut Nunani Avannarlerni nakorsassaaleqiffiusuni akissarsiatigut unammillerniartussaalluta. Nakorsanik amerlanerusunik maanga tikisitsiniarluta ilungersorluta sulivugut, ilungersunartumilli inissisimalluta, tikisinniarnerat ajornakusoorami, taanna oqarpoq ammaffiginerarlugulu nakorsanik nunani avannarlerni oqaaseqartut saniatigut allanik tikisitsisoqarsinnaanerata misissuiffigineqarsinnaanera. Naak tamanna Peter Vedstedip aamma mianersoqqussutigigaluaraa, tassa nakorsanut Cubamiunut atatillugu, soorlumi oqallinnermi aaqqiissutissatut taaneqartunut.
- Tamannali aamma ajornaatsuinnaanngilaq. Nunasinermut inatsit imaluunniit nunanut allanut inatsit suli tigunngilavut, nakorsalli tikisissinnaasavut tamaasa tikilluaqqusariaqarpavut. Tamatumunnga peqatigitillugu napparsimasut paarisussaavavut, taanna nassuiaavoq.
Aviisimi AG-mi atuarnerusinnaavutit. Aviisi uani pissarsiariuk: