Mimi Karlsen: 2035-imi angerlarsimaffeqanngitsoqassanngilaq
Isumaginninnermut suliffeqarnermullu naalakkersuisutut innersuunneqartup inunnik isumaginninnerup iluani suliassat angisuut marluk aallartipallassallugit piareersimaffigai. Angerlarsimaffeqanngitsunut aaqqiissutissat soraarnerussutisiaqartarnerullu iluani aaqqissuusseqqinnissat suliassani salliupput.
2035-mi kikkut tamarmik angerlarsimaffeqassapput. Naalakkersuisoqatigiilersut suliaq ukiuni tullerni sisamani aallartisassavaat.
Mimi Karlsen suliniutinut qinigaaffiit akimorlugit ingerlasussanut siuttuussaaq, taamatullu angerlarsimaffeqanngitsuunerup nunatsinni ajornartorsiutaajunnaarnissaanut suliaqartuussalluni. Taanna Inatsisartuni ilaasortaanermini ajornartorsiutip qaangernissaanut apeqquteqartuullunilu piumasaqartarsimavoq.
- Kingusinnerpaamik 2035-imi nunatsinni tamarmik angerlarsimaffeqartuussapput. Suliassaq tigussavara, aamma sulineq ingerlaannartumik aallartissaaq. Suliniutit pisariaqartut aallartissavagut, innuttaasut ikiortariallit siunissaq ungasinnerusoq eqqarsaatigalugu nammineersinnaasunngorlugit ikiorniassagatsigit, Mimi Karlsen, IA, Sermitsiaq.AG-mut oqarpoq.
Suliniutit ingerlasut nutaallu
Taanna erseqqissaavoq angerlarsimaffeqanngitsuunermut ajornartorsiutit tunngaviusut qanoq iliuuseqarfigineqartariaqartut, nunatsinni innuttaasut tamarmik ukiut 14-it qaangiuppata tamavimmik namminneerlutik angerlarsimaffeqarsinnaassappata.
Angerlarsimaffeqanngitsut 2017-imi nalunaarsorneqarmata 878-iussangatinneqarput. Isumaginninnermut naalakkersuisuusimasup Martha Abelsenip kingorna oqaatigaa angerlarsimaffeqanngitsut ukiuni kingullerni amerleriarsimanissaat ilimanartoq. Taamatullu angerlarsimaffeqanngitsuunerup qaangernissaanut iliuusissanik innersuussisussanik immikkut ilisimasalinnik 2019-imi suleqatigiissitaliorluni.
- Suliniutit pioreersut nalilersorneqassapput imaluunniit ingerlateqqinneqassapput, taamatullu pisariaqartunik aallartitsinissaq aamma ingerlanneqassalluni, Mimi Karlsen ilisimatitsivoq.
Soraarnerussutisiaqarneq pingaarutilik
Suliassaqarfinni aaqqissuuteqqitassatut annertuutut Inuit Ataqatigiinnit isigineqartoq tassaavoq soraarnerussutisiaqarnermut inatsit. Aappaasup isertitai aallaaviginagit soraarnerussutisiat inissinneqartarnissaat Inuit Ataqatigiit sulissutigiumavaat. Tamassumalu naammassinissaa Mimi Karlsenip aallartissavaa.
- Aappaasup aappani soraarnerussutisiaqartuusoq siusinaartumilluunniit soraarnerussutisiaqartuusoq pilersussanngilaa. Aningaasaqarnikkut periarfissaqarniariarutta allannguutissamik aaqqissuusseqqinnerit aallartissavagut, Mimi Karlsen oqarpoq.
Taanna nassuiaavoq Naalakkersuisunngortussat nunatta aningaasaqarneranik misissuissasut, aningaasaatillu qanoq inissisititersimaneri qularnaariarpata suliniutit aningaasalersorneqartussat tulleriaarneqassasut.
Naalakkersuisunngortussap nuannaarutigaa isumaginninnermit meeqqat, inuusuttut, ilaqutariillu immikkut naalakkersuisoqarfilerlugit nusunneqarsimanerat. Taamaasilluni nammineq isumaginninnermi allanut tunngassuteqartut suliarisinnaalerlugit. Erseqqissaavorli sulinermini pingaartumik meeqqat, inuusuttut ilaqutariillu naalakkersuisuannik, peqqissutsimut naalakkersuisumik aamma ilinniartitaanermut naalakkersuisumik qanimut suleqateqassalluni, kiisalu kommunit tallimaasut aamma suleqatigissallugit.