Mimi Karlsen Ivaaraq pillugu: Videokkut nakkutilliissutit ajunngitsuinnaanngillat

Arnaq annertuumik innarluuteqartoq innarluuteqartullu angerlarsimaffianni najugaqartoq qaammatip aallartilaarnerani meerartaarmat nunatsinni annilaartorpassuupput. Arnaq oqalussinnaananilu pisussinnaanngilaq. Nangeqarpoq, innarluuteqartullu angerlarsimaffianni Ivaaqqami Qaqortumiittumi najugaqarluni. Pisut aallaavigalugit arnaq kinguaassiutitigut atornerlunneqarsimasinnaanera pillugu politiit maanna suliaq paasiniaaffigaat.

Meeqqanut, inuusuttunut ilaqutariinnullu Naalakkersuisoq, Mimi Karlsen nunatsinni inuit innarluuteqartut angerlarsimaffiini najugaqartut toqqissisimasumik inuuneqarnissaannut qulakkeerinnissalluni maanna annertuumik suliassaqalerpoq.

Periarfissat ilaat, tassa videokkut nakkutilliisoqartalernissaq, arlalinnit periarfissatut taaneqareerpoq.

- Videokkut nakkutilliisoqarsinnaaneranut inatsiserpassuarnik peqarpoq. Pingaarnerpaavoq inuit pisinnaatitaaffii, innarluuteqarpataluunniit soorunami aamma inatsisit pisinnaatitaaffiillu malittussaavagut. Kinami oqarpa videokkut nakkutilliinerit atornerlunneqarsinnaanngitsut. Taamaammat tassunga tunngasoq, allatulli nakkutilliisinnaanermut tunngatillugu isumaqarpunga misissungassaqqissorujussuaq, meeqqanut, inuusuttunut ilaqutariinnullu Naalakkersuisoq, Mimi Karlsen Sermitsiaq.AG-mit apersorneqarnermini oqarpoq.

Naalakkersuisup angerlarsimaffiusuni najugaqartut toqqissisimanerunissaanut nakkutilliinissanik allanik nammineerluni siunnersuutinik taasaqanngilaq. Taassumalli erseqqissarpaa sulianut attuumassuteqartut peqatigalugit aaqqiissutissanik nassaarniartoqarnissaanik sulisoqassasoq.

Arnaq Ivaaqqamut uteqqereerpoq

Sermitsiaq.AG-p ippassaq allaaserisaa arnaq 23-nik ukiulik Qaqortup napparsimmaviani uninngareerluni Ivaaqqami immikkoortortaqarfimmut najukkaminut angerlartinneqarsimasoq. Mimi Karlsenip erseqqissarpaa arnaq angerlartinneqartoq, najugarisaa tassunga toqqissisimanarnerpaammat.

- Uani isigisariaqarparput, taama annertutigisumik innarluuteqartoq sumut allamut angerlassagami? Angerlarsimaffissaqanngilaq allamik nakkutilliisinnaasumik. Innarluutilik angerlarsimaffeqareerpoq, tassani sulisut sungiussisimapput, isumassuisinnaapput taakkulu taamaammat angerlarfigivai, Mimi Karlsen (IA) oqarpoq.

Nunatsinni innarluuteqartunut angerlarsimaffiit allat taama annertutigisumik innarluuteqartumik paaqqutarinninnissamut tulluarsarsimanngillat. Nuunnissaanut periarfissatuaasoq tassaavoq arnap nunarput ilisimasani qimallugu, sulisut nalusani najortussanngorlugit nunamut allamut nuunnissaa.

Suliat tupinnartut

Suliaq ajoraluartumik kisiartaanngilaq. Ivaaqqami najugaqartoq 2016-imi ulluni 16-ini siniffimmini nalasimavoq, niua naffakuusoq sulisunit paasineqarnissaata tungaanut.

- Pisut nassuiaruminaapput qanoq ilillutik arajutsineqarsinnaanersut. Aammalu pisumiit pisumut misissuinerit tamakku qanoq inerneqarneri ikkumaarnersut apeqqutaasarput. Taamaattumik pisut taakku ataasiakkaarlugit taakkartunngikkaluarlugit, kisianni ilumoorpoq suli arlaatigut qulakkeerinnittussanik ujartuisariaqarpugut taamatut inissittoqannginnissaanut, oqarpoq.

- Inuit innarluuteqartut angerlarsimaffiini kinguaassiutitigut atornerluisoqarsinnaanera eqqarsaatigalugu, ilumut kinguaassiutitigut atornerluisoqaratarsinnaanera inatsisitigut pinngitsuuitsinneqarsinnaava?

- Sumiluunniit kinguaassiutitigut atornerluineq sumiluunniit inerteqqutaavoq. Taamaakkaluartorli taamaattoqartarpoq. Sukkulluunniit pinaveersaartinnissaa tamatta aqqutissiuuttariaqarparput. Pisimappallu, tassa pinerlunneq pisimavoq, taamaammallu suliarineqassaaq pinerlunnertut.

- Nalunngilarput inatsisinik unioqqutitsinerusoq kinguaassiutitigut allatigulluunniit atornerluineq. Kisianni taamaattoqartarpoq, qanoq pinngitsuuitsinneqarsinnaagami?

- Inatsisit atuutsinniissaat soorunami pingaaruteqarpoq. Kikkulluunniit kinguaassiutitigut atornerlueqqusaanngillat. Taamaattorli taanna piuarpoq. Kikkut tamarmik eqqummaarinneratigut, isumassuisut allatullu suliaqartut, soorlu akisussaasuusut. Tassa taakku aamma nakkutilliisussaapput. Angajoqqaatut, aanaakkutut, allatulluunniit uagut isumassuisuusugut soorunami tamanna pinaveersaartussaavaat, taavalu atornerlunneqarsinnaasut aamma illersorsinnaassallugit, Meeqqanut, inuusuttunut ilaqutariinnullu Naalakkersuisoq, Mimi Karlsen naggasiivoq.

Misissuititsinissaq aallartissaaq

Meeqqanut, inuusuttunut ilaqutariinnullu Naalakkersuisoq ilisimatitsivoq inuit innarluuteqartut angerlarsimaffii arlaannaanulluunniit attuumassuteqanngitsunit misissuiffigineqarnissaat maanna pilersaarusiorneqartoq. Misissuinerit qanoq sivisutigissanersut qanorlu annertutigissanersut suli inissinneqanngilaq.

Ivaaqqami najugaqartut maanna misissorneqarsimalerput. Naalakkersuisoq ilisimatinneqarsimanngilaq najugaqartut allat arlaatigut innarlerneqarsimasinnaaneranik.