Skip to main content

Milutsitsisoq akiuussutissalertoorneqarsimasoq

Qaanaami akiuussutissalersuisoqarmat arnaq meeqqaminik suli milutsitsisoq ilanngullugu, kukkuluttortoqarneratigut akiuussutissalerneqarsimavoq, naak ersarissumik innersuussutigineqanngikkaluartoq naartusut milutsitsisullu akiuussutissalerneqarnissaat. Ernumanartoqanngilarli, nakorsaaneq nassuiaavoq.

Qaanaami akiuussutissalersuinerit siulliit majip arfineq-aappaanni ingerlanneqarmat ikinnerpaamik arnaq ataaseq meeqqaminik suli milutsitsisoq coronavirusimut akiuussutissalerneqarsimavoq. Tamanna nunatta nakorsaanerata Henrik L. Hansenip uppernarsarpaa.

Taama pisoqarpoq naak nunatta nakorsaaneqarfiata nittartagaani ersarissumik innersuussutigineqaraluartoq naartusut milutsitsisullu akiuussutissamik neqeroorfigineqassanngitsut, eqimattanut taakkununnga akiuussutissaq suli akuerisaanngimmat.

- Attaveqatigiinniartoqarnerani paatsooqatigiittoqarsimavoq, akiuussutissalersuilinnginnermilu paasissutissat naammattut pineqanngitsoorsimallutik, nakorsaaneq Henrik L. Hansen nassuiaavoq.

Ernumanartoqanngilaq

Nunatta nakorsaanerali eqqissisaavoq.

Arnarmi milutsitsisoq Modernameersumik coronavirusimut akiuussutissalertilluni kapitissimagaluaruniluunniit, arnamut meeqqamulluunniit ulorianaateqarneranik takussutissaqartoqanngilaq.

- Takussutissaqanngilaq arlaatigut anaanaasumut meeqqamulluunniit innarliinissaanik. Misissuinerit, soorlu USA-mi, takutippaat arnaq milutsitsisoq akiuussutissalertissimangaagat meeraq miluttoq aamma illersorneqalersinnaasartoq, oqarpoq.

Peqqinnissaqarfik saaffigisiuk

Arnat milutsitsisut akiuussutissalertinnissaat amerikamiut oqartussaasuinit apeqquserneqanngikkaluartoq, taamaattoq nunatta nakorsaanerata erseqqissarpaa Kalaallit Nunaata akiuussutissamut tunngatillugu Danmarkip innersuussutai malissagai.

- Milutsitsisut allat akiuussutissalertittoorsimappata taava kaammattorusuppagut peqqinnissaqarfimmut saaffiginneqqullugit, taamaasillutik pisariaqartitsigunik siunnersorneqarsinnaaniassammata, oqarpoq.

Peqqinnissaqarfimmi sulisut akiuussutissanik passussisuusut akiuussutissamik kapuilinnginnerminni kapitittussaq paasiniaavigeqqaartarpaat kukkuluttortoqannginnissaa pillugu. Akiuussutissalertittussaq naartunersoq, milutsitsinersoq, sapigaqartuunersoq allamilluunniit akiuussutissalertinnermini sakkortuumik qisuariaateqarsimanersoq paasiniaqqaarlugu akiuussutissaliineq ingerlanneqartarpoq.

Kikkut akiuussutissalertinnissamut neqeroorfigitissanersut pillugu nunatta nakorsaaneqarfiata nittartagaani atuarnerusinnaavutit.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER