Millionip kuartia: Ilinniagaqartut tallimat legatinnattut
Ivalo & Minik Fonden ilinniagaqartunut tallimanut, Norgemi, Maltami, USA-mi, Tuluit Nunaanni Islandimilu pikkorissartussanut, legatinik tunissuteqarpoq.
- Inuit anguniagartuut takorluugaannik piviusunngortitsinissamut qulakkeerinneqataaneq tamatigut nuannersuusarpoq.
Taama Minik Rosing, Ivalo & Minik Fondenimi siulersuisunut siulittaasoq, tusagassiuutitigut nalunaarummi allappoq.
Taama oqartarpoq taanna siulersuisullu sinneri ilinniagaqartunut tallimanut legatinik 250.000 koruuninik aningaasartalinnik agguaassereersullu.
- Legatinik tunineqartut ilinniagaqarnerminni ingerlalluarnissaat neriuutigalugulu kissaatigaara.
Upernaami legatit
Ilinniagaqartut Norgemi, Maltami, USA-mit, Tuluit Nunaanni Islandimilu ilinniassapput.
Camilla Guldager Ilisimatusarfimmi inuussutissarsiornermi aningaasaqarnermi ilinniakkaminut atatillugu University of Maltami semesterimi ataatsimi ilinniarnissamut legatinnappoq.
Camilla Kleemann-Andersen Ilisimatusarfimmi PhD.-iinngorniarnerminut atatillugu USA-mi University of Chicagomi the Linguistics and Anthropologymi ilinniarnissamut legatinnappoq.
Malou Platou Johansen Tormsømi Norges Arktiske Universitetimi Arktisk marinebiologimi Masterinngorniarluni ilinniarnissamut legatinnappoq.
Miyuki Daorana Aarhus Universitetimi antropologimi ilinniakkaminut atatillutu Tuluit Nunaanni University of Kentimi semesterimi ataatsimi ilinniarnissamut legatinnappoq.
Varna Marianne Nielsen Islandimi Reykjavikimi universitetimi Artsimi Masterinngorniarluni ilinniarnissamut legatinnappoq.
Inuussutissarsiortunit tunissutit
Ivalo & Minik Fonden pilersinneqarsimavoq kalaallinut ilinniagaqartunut nunani allani pikkorissarusuttunut legatinik tunissuteqartartussatut.
Legatinik agguassisarnerit pisinnaanngorsimapput Royal Greenlandimit, Royal Arctic Linemit, Grønlandsbankens Erhvervsfondimit aamma NunaFondenimit tunissutit tunngavigalugit.
Ivalo & Minik Fonden ukiaru 2023-mi legatinik agguaasseqqissaaq. Qinnuteqarnissamut killigititaasoq tassaavoq 1. oktober 2023.