Milliardinik taarsigassarsiniarneq akuerisaasoq: Naalakkersuisut Sermersuup pilersaarutaanut akuersipput

Kommuneqarfik Sermersooq illoqarfimmik ineriartortitseqatigiiffiup NCD-p akillisinnaajunnaaqqajaasup sanaartortitaanik tigusiniarluni suliani maanna nangissinnaanngorpaa.

Ingerlatsisimanermik misissuisoqarmat Kommuneqarfik Sermersuup NCD-llu Nuummi atuarfiliarsuarmut, taamanikkut aallartilluareersimasumut akiliuteqarsinnaanerisa qularnartoqartinneqarnera uissuummisitsisimavoq.

Kommuneqarfik Sermersuumi kommunalbestyrelsi ingerlatsivillu eqqissiallassinnaanngorput.

Naalakkersuisut sisamanngornermi kommunip 1,25 milliarder koruuninik taarsigassarsinissamik qinnuteqaataa nalunaaquttap-akunnerani ataatsimiissutigigamikku akuerivaat.

Sermitsiaq.AG-mit tamanna paasineqarpoq. Nalorninartortaqarporli, Naalakkersuisummi taarsigassarsinissamik akuersissuteqarnermut piumasaqaateqarsimanersut suli ilisimaneqanngimmat.

Taarsigassarsiassat kommunip illoqarfimmik ineriartortitseqatigiiffiutaata Siorarsiorfik - Nuuk City Developmentip (NCD) akiliisinnaajunnaannginnissaanut kommunillu inissiaatileqatigiiffiutaanut Iserimmut kattunneqarnissaanut aalajangiisuulluinnartussaapput.

Tamatuma saniatigut kommunip ukiunut aggersunut missingersuutai aamma taarsigassarsinissamik tunngaveqarput.

Aalajangiiniarneq sivisusimasoq

Kommuni ukioq manna aasaaneranili taarsigassarsinissamik Naalakkeruisunut qinnuteqarpoq. Naalakkersuisullu sisamanngornermi ataatsimiinnerminni taarsigassarsinissamik qinnuteqaat kiisami suliarisimavaat.

Kommunip taarsigassarsinermigut NCD-p sanaartortissimasai arlallit kiisalu Nuup qeqqani atuarfimmik sanaartorneq tigusinnaanngorpai.

Atuarfissaq aamma ulluunerani paaqqinnittarfeqartussaavoq, sanaartorneralu 750 millioner koruunit missaannik akeqassangatinneqarluni. Taamaammat upernaaq ingerlatsisimanermik misissuisoqarmat, sanaartornermut kommunip aningaasaliissutissanik inissiisimangitsoq paasineqarmat uissuummisoqarsimaqaaq.

Kattussisoqarnissaa naatsorsuutigineqartoq

- Sanaartorneq siumut ingerlallualereersoq anigaasaliissutissat inissinneqarsimannginnerat soorunami isornarpoq, misissuisimasut nalunaarusiaminni allassimapput.

Taarsigassarsisoqarneratigut atuarfissamut aningaasaliissutissat inissinneqarput, kommunimilu pisortaanerup Ole Jakobsenip siusinnerusukkut oqaatiginikuuaa, taarsigassarsianik akilersuinerup kommunip aningaasaqarnera tatissanngikkaa aamma atuarfinnut meeqqerivinnullu aningaasaliissuteqarneq kommunip suliassaanut iluaqutaassasut.

Ukiup naanngitsiarnerani aatsaat akuersissuteqartoqaraluartoq kommunimi pisortaanerup naatsorsuutigaa, NCD-p ukioq naatinnagu Iserimmut kattunneqarnissaanik pilersaarut naammassineqarsinnaassasoq.

Tabelimi tulliuttumi takuneqarsinnaapput, taarsigassarsianit sanaartukkat sorliit akilerneqassanersut.

Powered by Labrador CMS