Milliardinik aningaasaliiffigisassaq akuerineqartoq

Utoqqarmiut Kangerluarsunnguanni erngup nukinganik nukissiorfiup allilerneqarnissaa aamma Aasiaat Qasigiannguillu eqqaanni nutaamik erngup nukinganik nukissiorfiliornissaq Inatsisartuni akuerineqarput. Kommuni sanaartortoqarnissaanut piareersarluni aallartissimavoq.

Inatisartut erngup nukinganik nukissiorfiliornissamut 3,1 milliarder koruunit angullugit aningaasaliissuteqarnissaq sivikitsumik pingajussaanik suliarereerlugu akuersissutigaat.

Naalakkersuisut aningaasanik taarsigassarsissapput, aningaasaliissutigineqartussallu atorlugit Utoqqarmiut Kangerluarsunnguanni erngup nukinganik nukissiorfiup Nuummut pilersuinerata annertusitinneqarnissaa aamma Qasigiannguanut Aasiannullu pilersuisussamik nutaamik erngup nukinganik nukissiorfiliornissaq qulakkeerneqassapput.

Inatsisartut ataatsimiittarfianni politikkerit tamarmiullutik aningaasaliissuteqanrissaq marlunngornermi taperserlugu taasippput, naalakkersuisullu Aqqaluaq B. Egedep Naalakkersuisut sinnerlugit politikkerit qujaffigai, aningaasaliissuteqarnikkullu CO2-mik aniatitsisarnermut sunniuteqarnissaa erseqqissaassutigalugu.

- Tamanna Naalakkersuisut kikkut tamarmik minguinnerusumik avatangiiseqarnissaasa qulakkeerneqarnissaanik anguniagaqarnerannut naapertuuppoq. Eqqussuinermut il. il. aningaasartuutigineqartartunik tamanna annikilliliissaaq. Piujuartitsisumik mingutsimulli ineriartortitsinissamut qununngilagut. Mingutsitsisarneq aningaasartuuterpassuaqarfiusamat tamanna piffissaq ungasinnerusoq eqqarsaatigalugu imminut akilersinnaavoq, Aqqaluaq B. Egede oqarpoq.

Erngup nukinganik nukissiorfissat nutaat nunap CO2-mik aniatitsisarnera 2030-mi 114.000 tonsit missaannik annikillisissagaat naatsorsuutigineqarpoq. Inatsisissatut siunnersuummi sanaartornissamut piffissaliussami takuneqarsinnaavoq, sanaartornerit ukiut arfineq-marluk qaangiuppata naammassineqarsimassasut.

Kommunimut pilersaarummi nutaami 14 km-isut takitigisumik sullorsualiortoqarnissaa aqqutissiuunneqarsimavoq

Kommuneqarfik Sermersuumi Utoqqarmiut Kangerluarsunnguanni erngup nukinganik nukissiorfiup allilerneqarnissaanut aqqutissiuilluni aallartittoqarsimavoq. Kommunimmi kommunimut pilersaarut nutaaq tusarniaassutigalugu aallartissimavaat, pilersaarut malillugu Utoqqarmiut Kangerluarsunnguanni erngup nukinganik nukissiorfik allilerneqrassinnaanngussaaq.

Pilersaarut malillugu Kangerluarsunnguup tasersuata aamma Isortuarsuup tasiata akornanni nutaamik sullorsualiortoqarsinnaassaaq.

Sullorsuaq 14 kilometerit missaannik takissuseqassaaq, erngullu nukinganik nukissiorfiup naammattumik imissaqarnissaanik qulakkeerinnissalluni.

Tamatuma saniatigut sanaartorfiup tungaanut sulinermi atorneqartussamik aqquserniortoqassaaq imaluunniit pisuinnarnut aqqutissaliortoqassalluni.

2024-mi imermik amigaateqartoqalersinnaasoq

Inatsisissaq piareersarlugu suliarineqarmat oqaatigineqarsimavoq, Utoqqarmiut Kangerluarsunnguanni erngup nukinganik nukissiorfiup allilerneqarnissaa pisariaqarluinnartoq - tassunga ilanngullu sullorsualiortoqarnissaa pisariaqartoq, 2024-mi nukimmik tamakkiisumik pilersuinissamut tatsip imaarutingajassimanissaa naatsorsuutigineqarmat.

Asiap naatsorsuisimanera naapertorlugu, Isortorsuup Tasia Kangerluarsunnguup Tasianut sanilliulluni ukiumut pingasoriaatingajammik imermik kuuffigineqartarpoq.

114 km lang transmissions linje skal sikre strøm til Aasiaat

Nukissiorfissaq Qasigiannguanut Aasiannullu erngup nukinganik pilersuisussaq sakkortusaaveqassaaaq, kangerlummi Kangersunermiittussamik. Aamma tatsit Kuussuup Tasiata Qinngallu Ilulialeeraata akornanni sullorsualiortoqassaaq, ernup nukinganik nukissiorfissap imeqarfiatut atorneqartussamik.

Tatsit pineqartut Qasigiannguit kujamut kangiani 20 km-it missaannik ungasitsigisumiipput. illoqarfinnullu pineqartunut marluusunut nukimmik pilersuissallutik. Qasigiannguanut 31 km-it missaannik takissusilimmik aamma Aasiannut 114 km-it missaannik takissusilimmik atassuteqaasiisoqassaaq.

Suliniutigineqartut nunamut iluaqutaalluassasut naatsorsuutigineqarpoq, taamaammallu Naalakkersuisut 3,1 milliarder koruuninik taarsigassarsisinnaanerat Inatsisartunit akuerineqarsimalluni. Aningaasat taarsigassarsiarineqartut Nukissiorfinnut suliassanik sanaartortitsisussanut taarsigassarsiariteqqinneqassapput.

Powered by Labrador CMS