Milliaardeerip nulia tammaaneqartoq angerlarsimaannartuuvoq
Arnaq norgemiu Anne-Elisabeth Hagen tammaaneqartoq uinilu pisoorsuaq Tom Hagen eqqissisimasumik inuupput.
Anne-Elisabeth Hagen, 68-inik ukiulik, utoqqalinersialik pingasunillu qitornaqartoq, Oslomi angerlarsimaffimminiit sapaatit akunneri qulit matuma siorna tammarneqartoq, milliaardilikkaanik aningaasaateqaraluarluni eqqissisimasumik inuuneqarpoq.
Hagen norgemiut aviisiata Aftenpostenip nutaarsiassiinera naapertorlugu Lillehammerip kujataani illoqarfeeqqamit Gjøvikimeersuuvoq. Ilaqutaasut ilisarisimannittaasa arnaq qimaasuutut ilassiortutullu nassuiarpaat, arnallu qitornani ernuttanilu piffissaqarfigilluartarai nassuiarlugu. Taanna nammineerluni immikkut isertitaqarsimanngilaq.
Norgemiut nutaarsiassaqartitsiviat VG malillugu, taanna 19-inik ukioqarluni peqatiminut Tom Hagenimut, illoqarfimmi Granimi Opplandimiittumi naapissimasaminut, katippoq. Aappariit Lørenskogimut ulloq manna tikillugu najugarisaminnut, taamani meeqqatik marluk ilagalugit 1982-imi nuupput.
Illu najugarisaat anginngitsuuvoq aqqusernup naanerani inissisimasoq, ilaqutariillu milliaardeeriunerannik takutitsisuunani.
Tom Hagen Aftenposten malillugu nukissiuuteqarfimmik Elkraftimik 1992-imi pilersitseqataasuuvoq, taannalu Norgemi innaallagiamik ullumikkut atuisorpassuaqarpoq. Suliffeqarfik iluatsilluarpoq, 1,75 milliaardit koruuninillu siorna kaaviiaartitaqarluni.
Taassuma saniatigut Tom Hagen inissianut arlalinnut aningaasaliisimavoq suliffeqarfinnillu arlalinnik pilersitsisimalluni.
Inuussutissarsiornermut tunngasunik nutaarsiassiisartoq Kapital malillugu Tom Hagen 1,3 milliaardit koruuniuteqarpoq. Taamaasilluni Norgemi inuit pisuunersat 200-nut ilaalluni.
Norgemi nutaarsiassaqartitsiviit malillugit aappariit angerlarsimaffimminni inuunertik suliffimmilu inuunertik pillugu avammut nittarsaassisuunngillat. Taamaammat Hagenip suliffeqarfiutaani ingerlataanilu siulersuisuni ilaasortat ikittuinnaapput. Taakkununnga ilaavoq aappariit paniat, Anne-Elisabeth Falkevik Hagen, Tom Hagen qitornaallu allat marluk tamarmik siulersuisuni aamma ilaasortaanikuupput.
Aftenposten malillugu Hagenikkut maluginiarneqarnaveersaartarsimapput pisariaqanngitsumik soqutiginnilersitsiumanatik.
Tom Hagenili inuussutissarsiorneq pillugu aviisimi Dagens Næringslivimi pigissaarneq pillugu allaaserisani nangeqattaartuni juulimi peqataasimavoq. Norgemiut politiivi malillugit tamanna aallarussisimanermut suliamut attuumassuteqarsinnaasoq, Aftenposten allappoq.