Miliuunilikkaanik annaasaqarsimaneraaneq pillugu suliaq: Namminersorlutik Oqartussat Nunatta Eqqartuussiviani ajorsartinneqartut
Suliffeqarfiit sanaartornermik ingerlatallit marluk suliareqqitassanngortitami Nunatta Eqqartuussivianit pinngitsuutinneqarput, Namminersorlutillu Oqartussat suliami aningaasartuutigineqarsimasunut 937.337 koruuninik akiliisussanngortinneqarlutik.
Suliaq suliarinnittussarsiuussinermi unioqqutitsilluni isumaqatigiissusiorsimanermit tunngaveqartoq, ukiut qulit matuma siornatigut eqqartuussivimmi aalajangiiffigineqarpoq.
2012-imi suliffeqarfiit sanaartornermik ingerlatallit Kang Total Byg aamma B.J. Entreprise suliarinnittussarsiuussinermi unioqqutitsillutik isumaqatiigiissusiorsimasutut aningaasarpassuarnik akiliisussanngortinneqarsimapput.
AAMMA ATUARUK: B. J. Entreprise: Taamaasioqqissanata neriorsuivugut
Akiliisussanngortitsisoqarneranit ukioq ataaseq qaangiummat Namminersorlutik Oqartussanit aalajangiunneqarsimavoq, timmisartoqarfiup utaqqisarfiata allilerneqarnissaa pillugu Kang Total Byg-imut 2008-mi isumaqatigiissutigineqarsimasumi annaasaqarsimaneq pillugu suliffeqarfiit marluk taakku pineqartut eqqartuussivimmut sassartinneqassasut.
Ineqarnermut Attaveqaasersuutinullu Naalakkersuisoqarfimmit ilisimatitsissutigineqarpoq, taamanikkut annaaneqarsimasut 9 aamma 11 millioner koruunit akornanniittutut naatsorsorneqarsimasut:
To millioner koruuninik akiliisussanngortillugit pineqaatissinneqarsimasut
- Suliniummut missingersuut B suliariumannittussarsiuussinissaq qaammatialunnik sioqqullugu suliarineqarsimasoq 12.916.000 koruuninik naleqarsimavoq (m2-mut 22.180 koruunit missaannik nalilik), appasinnerpaamik neqeroorutigineqarsimasoq Kang Total Byg ApS-imeersoq 23.205.000 koruuninik naleqarsimavoq (m2-mut 39.840 koruunit missaannik nalilik). Tamanna tunngavigalugu annaasat 9,0 aamma 11,0 millioner koruunit akornanniissasut nalilerneqarsimavoq, naalakkersuisoqarfik Sermitsiaq.AG-mut allappoq.
Sanaartornermi allannguisoqarsimanera pissutigalugu Namminersorlutik Oqartussat annaasatut taasimasaat fire millioner koruuninut annikillisinneqarsimapput, Namminersorlutillu Oqartussat 2019-imi apriilip qaammataani tamakkiisuunngitsumik ilalerneqarsimallutik.
Suliffeqarfiit taakku marluk pineqartut suliffeqarfinnilu pisortaanerit to millioner koruuninik 2013-imiit ernialerlugit taarsiisussanngortinneqarsimapput, kiisalu suliami aningaasartuutigineqartunut 337.375 koruuninik akiliisussanngortinneqarsimallutik.
Nunatta Eqqartuussivia: Namminersorlutik Oqartussat uppernarsaatinik saqqummiussisimanngillat
Suliarli nunatta eqqartuussivianut suliareqqitassanngortinneqarsimavoq, tassanilu suliffeqarfiit suliareqqitassanngortitsisut ilalerneqarlutik. Nunatta Eqqartuussivianit aalajangiunneqarsimavoq, Namminersorlutik Oqartussat Kang Total Byg-imik Kangerlussuarmilu sanaartortitsinissamik isumaqatigiissuteqarsimanermut atatillugit aningaasatigut annaasaqarsimanerarneq pillugu uppernarsaatinik saqqummiussisimanngitsut.
- Nunatta Eqqartuussiviat ulloq 25. maj 2022 suliareqqitassanngortitaq aalajangiiffigaa. Tassani Kang Total Byg Sps aamma BJ Entreprise pinngitsuutinneqarput, Namminersorlutillu Oqartussat suliamut aningaasartuutaasimasunut katillugit 937.337 koruuninik akiliisussanngortinneqarlutik. Taakkunannga 587.337 koruunit Kang Total Byg ApS-imut 350.00 koruunillu BJ Entreprisemut akiliutigineqassallutik, naalakkersuisoqarfimmit ilisimatitsissutigineqarpoq.
Ukiorpaalunni assortuuttoqareersoq suliaq maanna naammassineqarpoq - Naalakkersuisoqarfiummi eqqartuussissuserisuata nalilerpaa, suliamut atatillugu uppernarsaatit tunngavigineqarsinnaanngitsut, taamaammallu Eqqartuussiviit Qullersaannut suliareqqitassanngortinneqarsinnaanngitsut.