Mikrobiologi nerisaqarnikkut pikisitserusuttoq

Kalaallit Nunaanni inuussutissatigut nutaamik eqqarsartariaqalerpugut,pinngortitameersunillu nerinissaq aalajangiusimallugu. Taama mikrobiologi Aviaja LyberthHauptmann ukiut tallimassaanik kalaallit nerisaqariaasiannik ilisimatusartoq isumaqarpoq.

- Kalaallit Nunaanni ima iluanaartigaagut nerisassavut nammineq pisarisinnaagatsigit.
Inuppassuit tamanna sinngagissajunnarsivaat. Kalaallit Nunaat tassaavoq toqqaannertumik
nerisassanik aallertarfik, Aviaja Lyberth Hauptmann oqarpoq.

Aviaja Lyberth Hauptmann mikrobiologitut ilinniarsimavoq ilaatigut kalaallit qangaaniilli
nerisannaavisa imarisai ilisimatusaatigisimalljugit. Suliniutini taavaa, Den grønlandske
kostrevolution (Kalaallit Nunaanni nerisaqarnikkut pikisitsineq), nunarsuarmi tamarmi
nerisassat neqimik aallaaveqartut naatitanit aallaaveqarnissaannik isiginnittaaseq
allanngortinniarlugu ilisimatusarnermini oqariartuutiginiarlugu.

- Kalaallit qanganiilli nerisannaavi nunarsuarmi naatitanik tunngaveqarluni
nerisaqarnissamut siunnersuutinik allannguilluinnarput. Nerisaqarnissamut pingasunik
teqeqqulik kussanngaartikkukku, tassalu neqerujussuaq naatitamerngillu, taava kalaallit
nerisaqariaasiat takussavat, Aviaja oqarpoq.

Mikiarsianik nerinerusarsimasut

Tamannalu imaanngilaq ajortuusoq, taanna oqarpoq. Kalaallit nerisannaavisa nerisassanik naatitanik aallaaveqartunik eqqussukkanik taarsernissaat peqqinnarnerunaniluunniit
piujuartitsinerunngitsoq, taanna erseqqissaavoq.

- Naggueqatigiit Inuit nunarsuarmi sakkortunerpaanik atugaqarlutik inuusinnaasimappata
taava nerisaat neqimik tunngaveqartut taakkununnga peqqinnartuusimassapput. Uumasoq
tamaat pamiuaniit siuneranut nerineqarsimappat taava naatitanik nerinermi
pissarsiassaagaluit inuussutissartat tamarmik pissarsiarineqassapput, taanna nassuiaavoq.

Piffissaq taanna atorlugu Kalaallit Nunaanni inuussutissat pillugit oqaluttuarisaanikkut
najoqqutassaminik misissuivoq. Aviajap aalajangiusimavaa mikiarsiineq qanga Kalaallit
Nunaanni nerisaqariaatsimi maannamut ilisimasatsinnit pingaarnerujussuusimasoq.
Mikiarsiineq ukiuni kingullerni igariaatsimi nutaami saqqummeriartorsimaqaaq,
najoqqutassatoqqanilu Aviajap nassaarisimasaani assersuutissaqarpoq Kalaallit Nunaanni
Inuit aamma nerisassat mikiarsimasut qerisunit piumanerusimagaat.

Aviaja Lyberth Hauptmannip apersorneqarnera tamaat Arnanummi saqqummeqqammersumi atuaruk.

Powered by Labrador CMS