Mikkeli talerminnermi Europami pissartanngorniuteqataalersoq
MIkkel Andersen talermilluni EM-imi tallimanngornermi aamma arfininngornermi pissartanngorniuteqataassaaq, nunatsinniit kisiartaalluni peqataassalluni.
Talermilluni unammisartoq Mikkel Andersen Europami pissartanngorniunnermi, Laukaa, Finlandimi tallimanngornermi aamma arfininngornermi pissartanngorniunnermi ilaassaaq.
Mikkel Andersen, timersuummi medaljennattareersoq, europamesterskabimi peqataaqqilerpoq.
- EM-ip tungaanut sungiusarluni pilersaarut tulluarsagaq malillugu sungiusarnikuuvunga. Pitsaasumik sunniuteqartoq malugaara, unamminissamullu piareersimavunga, Mikkel Andersen Sermitsiaq.AG-mut oqaluttuarpoq.
Nunat 17-it katillugit 264-inik peqataatitaqarput, Mikkel Andersenilu Danmark sinnerlugu peqataavoq, nunarput sinnerlugu suli peqataasinnaannginnami.
Medalje anguniaraa
Mikkel Andersen Rage Armwrestling Cupimi Danmarkimi aprilimi unammigami marlunnik guldinnappoq ataatsimillu sølvinnalluni. EM-imi pitsaasunik angusaqarnissani aamma siunniuppaa.
Saamimmik talerminnermi tallimanngornermi unammisoqassaaq, Mikkel Andersenilu oqimaassuseq 70 kg-mi peqataassaaq. Talerpimmik talerminneq arfininngornermi ingerlanneqassooq.
- Naluara suna naatsorsuutigissanerlugu. Anguniagarali tassaavoq ujaminnannissaq. Unamminissamut piareersimavunga, piareersimanngikkaluaruma peqataassanngikkaluarpunga, Mikkel Andersen oqarpoq.
Tallimanngornermi aamma arfininngornermi unamminerit armsportfederation.com-ip nittartagaani malinnaasinnaavutit.
Elite Sports Greenland, Qarsoq Tegnestue, Pilemand aamma Sannassisoq ApS EM-imut peqataanissamut aningaasaleeqataapput.