Miki Jensen partiip allattaaneratut tunuartoq
Siumup partiimut allattaanini, Miki Jensen, atorfimmi pingaarutilimmi qaammatini quliinnarni atorfeqareerluni tunuarniarluni aalajangersimasoq, inuulluaqqusariaqalerpaa.
Siumumi partiip allattaanera suli alla tunuarpoq. Miki Jensen tallimanngormat partiimi ulloq kingulleq sulivoq, maannalu soraavinnginnermini feeriarluni.
Siumumi aaqqissuussaanikkut siulittaasup tulliata, Inga Dora G. Markussenip, tamanna Sermitsiaq.AG-mut uppernarsarpaa.
Miki Jensen, Mikael Petersen, narrunarsaalluni tiinganiartarsimasutut pasilliutit pillugit suliunnaarallarsinneqartoq, paarlallugu siorna marsimi sulilerpoq.
Miki Jensen Folketingimi Siumumit ilaasortamut 2012-imi 2015-imut allattaasimavoq, tamatumalu kingorna Folketingimi Nunatta Qitornaanit ilaasortamut 2016-imit 2019-imut allattaasimalluni allattoqarfimmilu pisortaasimallun.
Miki Jensen atorfimminit soraarnera pillugu oqaaseqartinniaraluaratsigu iluatsissinnaasimanngilarput.
Miki Jensen artorfimminik suliunnaarnerminik tunngatillugu parteeqatiminut imatut oqaaseqarsimavoq:
- Partiip allattaaneratut atorfimmut atatillugu aqqusaakkat amerlapput. Atorfik assoroornarlunilu piffissamik annertuumik atuiffiuvoq. Atorfik peqqinnartumik ilaqutariittut inuunissatsinnut tulluarsimanngilaq. Taamaattumik aalajangerpunga piffissaq ilaquttannut erninnullu ataataalluarnissamut atorumallugu.